Violacion di derechonan internacional na centro di detencion Mericano na Cuba, Guantanamo, ta inclui detencion ilegal, condicionnan inhumano, maltrato y huicionan inhusto. Na Aruba tambe ta existi dos centro di detencion di Guarda Nos Costa cu ta cay bao direccion di Richard Kramers y Minister di Husticia, Rocco Tjon, unda ta tuma luga detencionnan ilegal ademas di no ta respeta derechonan fundamental di e personanan cu ta deteni buscando proteccion di refugiado (asilo).

E dos centro di detencion aki no ta cumpli cu standard internacional pa refugiado y tampoco nan ta cumpli cu sentencianan di hues, burlando di e manera aki di Corte di Prome Instancia di Aruba y hasta ta retene propiedad (eigendom) di detenido cu ya hues a dun’e su libertad.

Esaki a sucede den un caso cu comunidad a conoce dos siman pasa a traves di un video di Bon Dia Aruba cu a bay viral riba rednan social, unda cu mas di 1 miyon persona a wake riba plataformanan internacional.

Hechonan di e caso aki

Maykol Chavez a drenta legalmente na Aruba dia 11 di februari di 2019 caminda el a pidi proteccion di refugiado (asilo) cerca e funcionario di migracion na aeropuerto. El a yena un formulario di tres blachi solicitando e proteccion, cu segun informacion concreto, ainda e prome peticion ta den sistema di DIMAS.

For di e dia ey, Chavez tabata wardando un contesta di DIMAS tocante su peticion pa proteccion di refugiado. Dia 10 di december di aña 2021, Chavez a bolbe pidi asilo pa motibo cu e no a haya contesta riba e prome peticion di 2019.

Dia 25 di mei di aña 2022, Chavez, di nacionalidad Venezolano, a ser deteni di manera ilegal. Despues 9 di juni ultimo hues di Corte di Prome Instancia, M.E Brown de Haseth a duna e libertad na Chavez di manera inmediato. Hues su decision tabata bisa: “verstaat dat verzoeker, voor zover hij nog in ophouding is, onmiddelliijk in vrijheid dient te worden gesteld”.

Sabiendo e decision di e honorabel hues De Haseth, Richard Kramers, director di Guarda Nos Costa no a laga Chavez den libertad, pero si a laga nan transport’e na un otro centro di detencion ubica na aeropuerto, unda a lag’e deteni contra un orden di libertad di un hues.

Diabierna 10 di juni, Guarda Nos Costa a presenta Chavez dilanti un hues comisario pa mantene su detencion pendiente di su deportacion. Honorabel hues A.J Martijn ta e hues comisario cu a duna di conoce den su sentencia cu Chavez su detencion tabata ilegal, un biaha mas, y a ordena su libertad di manera inmediato: “De rechter-commissaris acht de inbewaringstelling onrechtmatig en beveelt de onmiddellijke opheffing van de inbewaringstelling”. Tambe el a bisa cu e detencion di Chavez desde di dia 25 di mei tabata contra ley.

Dia 13 di juni ultimo minister di Husticia, Rocco Tjon den un conferencia di prensa a declara cu diabierna 10 di juni el a manda un carta pa Guarda nos Costa bisando pa respeta decision di hues, unda cu reportero di Bon Dia Aruba a solicita minister Tjon pa comparti e carta aki. Den e mesun conferencia di prensa el a sigura cu Maykol Chavez a wordo poni den libertad dia 9 di juni.

Pero reportero di Bon Dia Aruba a confirma cu minister Tjon su declaracion unda el a indica cu Chavez a keda den libertad dia 9 di juni ta totalmente falso, den ningun momento e no a keda den libertad, sino te diabierna 10 di juni cu incidentenan y maltrato cu a keda den evidencia den e video y den un potret di Bon Dia Aruba di ayera 21 di juni, unda por a mira cu ainda Chavez su slofnan tabata tira pafo di Guarda nos Costa.

Ayera 21 di juni 2022, Minister Tjon a comparti un carta cu Bon Dia Aruba: “Pa contesta bo preguntanan akibao, namens Minister di Husticia y Asuntonan Social, adhunto por haya e carta cu a wordo entrega na director di Guarda nos Costa, Sr. Kramers, personalmente, dia 10 di juni 2022.” Esaki no ta contesta e pregunta specifico y simpel di Bon Dia Aruba di “ken ta e persona cu a mantene Chavez ilegalmente deteni contra un orden di hues dia 9 di juni? Si ta minister di Husticia of director di Guarda nos Costa, Richard Kramers”.

Te dia di ayera, 21 di juni di 2022, director di Guarda nos Costa tin reteni e pertenencianan personal (eigendom) di Chavez, cu ta e cosnan di mas basico cu un ser humano mester di dje, cu ta su pañanan, su sapato, serbete, su clechinan y su documentonan di asilo pa e por tin derecho riba un proceso husto, manera nos sistema hudicial ta supone di funciona (Algemene beginselen van behoorlijk proces).

Tocante esaki, reportero di Bon Dia Aruba a puntra minister Rocco Tjon si minister lo sigui cu retencion di propiedadnan priva (eigendom) di Chavez? Unda cu por medio di un carta di dia 20 di juni ultimo pa 3.43 di atardi, minister a wordo poni na haltura cu Chavez su pertenencianan ta reteni na Guarda nos Costa, despues di mas di un siman cu el a keda liber cu un orden di un hues.

“Pa loke ta trata preguntanan specificamente pa Guarda nos Costa, nos ta sugeri pa haci esaki directamente cerca e persona concerni, cual den e caso lo ta e director di e departamento, Sr. Kramers.”

Reportero a haci otro pregunta na minister Tjon: “Ta duidelijk cu minister na haltura aworaki cu Guarda nos Costa ta bezig ta retene Chavez su propiedadnan ilegal. Como minister di Husticia y como hefe directo di Kramers, minister ta keda permiti e retencion di propiedad di Chavez?” Prome cu ciere di redaccion, e redactor no a haya contesta.

Igualmente, reportero a manda un carta cu preguntanan pa su excelencia Gobernador di Aruba, Alfonso Boekhoudt pa wak si e lo garantisa Chavez su derechonan fundamental y seguridad huridico, mirando cu orden di hues no a wordo respeta. Tambe a haci algun pregunta pa Gobernador. Dia 20 di juni gabinete di Gobernador a contesta e carta , bisando cu e carta a wordo manda na minister Tjon y tambe a pidie un contesta por escrito di e caso specifico aki.

Dialuna ultimo, 20 di juni den un conferencia di prensa di Secretario di Estado Alexandra van Huffelen, conhuntamente cu mandatarionan di otro islanan di Reino Hulandes y prome minister di Aruba Evelyn Wever-Croes, a bin dilanti e pregunta di e colega periodista Luis Villegas, puntrando Secretario di Estado Van Huffelen si tin obhecionnan contra un maneho di proteccion (asilo) comun pa henter Reino?
Mirando cu Secretario di Estado anterior, Raymond Knops a stop pagamento di e sosten di likides na Corsou pa via di violacion di EVRM, y mirando tambe e aanhouding y inbewaring di Maykol Chavez contra ley, ta parce cu ta e tempo pa reino actua consistentemente den e tereno aki?

Pa cu esaki Van Huffelen su contesta ta cu “e hechonan ta cu berdad ta sumamente importante den henter Reino Hulandes cu personanan cu ta pidi proteccion di refugiado (asilo) tin cu haya un procedura corecto manera e tratado EVRM ta indica, cu no ta solamente asilo por pidi, pero cu nan tin derecho tambe di haya ayudo di abogado y tambe tin derecho di keda den un luga cu ta adecua. E posicion di Hulanda ta cu personanan cu ta pidi asilo tin cu wordo trata na un manera corecto y humano den henter Reino Hulandes”.

Awe Bon Dia Aruba lo tuma contacto cu director di Guarda nos Costa, Richard Kramers pa asina haya contesta di e pregunta mas simpel y basico, ken ta e persona cu a detene Chavez di manera ilegal dia 9 di juni contra un sentencia di hues?

LEAVE A REPLY

Please enter your comment!
Please enter your name here