Despues cu awa di riool a sali for di sistema di rioolering un siman y mey pasa banda di hotelnan grandi, AWSS a manda un team pa haci investigacion di kico por tabata e causa.
Personal di AWSS a haci inspeccion na diferente sitio y a bin detecta cu e tapa di e sistema di rioolering tabata habri y a benta diferente materialnan den e sistema, a descubri paña, baranca, hero y hasta un biga. Esaki a haci cu e fluho di awa di riool a keda obstaculisa, cu consecuencia cu el a bin ariba y a causa molester.
Tambe a bin descubri cu tapanan di pos cu normalmente ta cera a ser habri banda di algun hotel.
Tur esaki ta mustra cu lo por ta trata di un of mas persona cu mal intencion a planea y actua den coordinacion pa causa molester y haci daño na nos turismo y imagen di Aruba.
Mientrastanto gerencia di AWSS a tuma e decision pa entrega keho na autoridadnan, pa asina un investigacion penal por cuminsa pa haya sa kendenan ta tras di e actonan aki, cu ta mustra di ta sabotahe. E asunto aki ta algo serio y gerencia di AWSS ta dunando esaki tur e atencion necesario.
