Ministerio di Finanzas, Asunto Economico y Sector Primario, mr. Geoffrey Wever (Futuro), den estrecho cooperacion cu Gobierno di Corsou, representa door di Minister di Desaroyo Economico di Corsou, Mr. Roderick Middelhof, ta anuncia oficialmente publicacion di e “Terms of Reference” (ToR) pa contrata un consultante cu lo guia e proceso pa realisa un conexion di ferry pa pasahero entre Aruba y Corsou.
Cu e publicacion aki, Gabinete AVP-FUTURO ta marca un logro concreto den su vision pa fortalece cooperacion regional, amplia oportunidad economico y crea un sistema di transporte mas resiliente pa nos region, segun un comunicado di gobierno.
Durante añanan, conectividad entre e islanan ABC tabata limita principalmente na transporte aereo, cu costo relativamente halto y disponibilidad limita. E proyecto di ferry ta enfoca pa crea un alternativa accesibel, eficiente y duradero, cual lo facilita mobilidad di persona, comercio y intercambio cultural, gobierno a indica den e comunicado.
E iniciativa aki ta basa riba e Memorandum of Understanding firma na 2023 entre Aruba y Corsou, cual ta enfoca riba cooperacion economico y integracion regional. Pa Aruba, esaki no ta solamente un proyecto di transporte, sino un instrumento strategico pa diversificacion economico, fortificacion di comercio entre e islanan y expansion di oportunidad pa sector priva.
“Un conexion di ferry moderno y bon structura ta un inversion den futuro di nos region. Esaki ta fortalece nos posicion economico, amplia oportunidad pa comercio y turismo, y ta crea un alternativa resiliente pa nos sistema di mobilidad,” Minister Geoffrey Wever ta declara.
Idea tras di e proyecto ta cu e ferry lo habri caminda pa un modelo di turismo mas dinamico, incluyendo concepto di island hopping, unda bishitantenan internacional y residente por move facil entre islanan pa festival cultural, evento deportivo, reunion familiar y oportunidad comercial.
Ademas, e proyecto lo contribui na:
Stimula comercio bilateral;
Facilita movemento di trahado y empresario;
Crea oportunidad nobo pa sector logistico y maritimo;
Fortifica cooperacion economico den Caribe;
Un proceso structura y transparente.
Gobiernonan di Aruba y Corsou ta busca un compania di consultant cu experencia amplio den transporte maritimo, factibilidad infrastructural y proceso di destaho publico compleho.
E compania selecciona lo guia e proyecto den cuatro fase critico:
Analisis integral di factibilidad economico, legal y tecnico;
Desaroyo di documento di Request for Proposal conforme mercado;
Maneho completo di e proceso di destaho pa operador di ferry;
Evaluacion final y recomendacion pa otorgamento di e trabao.
“Nos compromiso ta claro: un proceso transparente, profesional y conforme ley. Bon gobernacion y planificacion riguroso ta central den e proyecto aki, pa asina garantisa seguridad, sostenibilidad ambiental y viabilidad economico a largo plaso,” Minister Wever enfatisa.
E destaho ta maneha como un proceso publico di acuerdo cu leynan vigente na Aruba. Interesadonan por revisa e ToR oficial y tene cuenta cu siguiente fecha indicativo:
Deadline pa pregunta: 6 maart 2026
Deadline pa entrega di propuesta: 20 maart 2026
Otorgacion contrato consultant: 30 maart 2026
Seleccion anticipa di operador di ferry: 26 februari 2027
Propuestanan mester wordo entrega digitalmente y mester demostra experencia comproba den transporte maritimo, estudio di factibilidad infrastructural y destaho publico. Cu e paso concreto aki, Gabinete AVP-FUTURO ta confirma su compromiso cu pueblo di Aruba pa desaroya un region mas integra, mas accesibel y economicamente mas fuerte, den interes di tur ciudadano y futuro di nos pais, segun Minister Geoffrey Wever.
