Rob Jetten, minister di Clima y Energia ta bay haci un bishita di trabao entre dianan 8 pa 17 di mei proximo na Aruba, Bonaire y Corsou. E bishita ta den marco di transicion di energia y clima riba e islanan.
Su biahe ta bay cuminsa na Bonaire dia 8 di mei, unda entre otro, e minister ta bay tene combersacion cu miembronan di bestuurscollege y Bonaire Future Forum. Den e programa tambe tin combersacion cu representantenan di compania di awa y energia di Bonaire, WEB; Contour Global y Bonaire Brandstof Terminals, BBT. Anochi ta bay presenta oficialmente na minister Jetten e rapport di e Klimaattafel Bonaire.
Dia 9 di mei, e minister ta bay haci un bishita na Lac Bay, unda e ta bay wordo guia pa Dutch Caribbean Nature Alliance (DCNA) y e ta bay den combersacion cu entrepreneurnan tocante sostenibilidad durante e establecimento di e Business Federation Bonaire.
Firma di acuerdo di cooperacion
Na Aruba, minister Jetten ta bay tene combersacion cu Gobernador, minister presidente y presidente di Parlamento, como tambe lidernan di fraccion.
E bishita ta den marco di e prome Caribbean Climate & Energy Conference (CCEC) cu ta organisa pa Aruba y Hulanda dia 10-12 di mei proximo. Durante e conferencia, representantenan di e islanan di region Caribense, ademas di partidonan relevante for di exterior, manera estadonan isla den Ocean Pacifico, organisacionnan di ONU, institutonan educativo y organisacionnan financiero ta bay bin hunto den combersacion tocante e posibilidadnan pa agilisa e transicion energetico y di clima riba estadonan isla chikito.
Durante e conferencia, Hulanda y Aruba ta bay firma un acuerdo di cooperacion riba tereno di energia duradero. Riba e ultimo dia di e conferencia, minister Jetten ta bay haci un bishita na diferente proyecto di energia sostenible, y e ta bay tin combersacion cu studiantenan di Universidad di Aruba y EPI MBO.
Corsou
E bishita di trabao ta continua dia 15 di mei na Corsou. E minister ta bay papia cu entre otro e Gobernador, minister presidente y minister di Desaroyo Economico, cu ken e ta bay firma un acuerdo pa reforsa e cooperacion entre ambos pais riba tereno di energia sostenible.
Dia 16 di mei e minister ta bay duna un discurso pa studiantenan di Universidad di Corsou, haci un bishita na centro di investigacion Carmabi, y ta bay ricibi un presentacion di Climate Change Curaçao tocante e impacto di cambio climatico riba e isla.
Despues e minister ta invita pa representantenan di e organisacion LHBTIQ di Corsou pa un combersacion.
E ultimo dia di su biahe di trabao, dia 17 di mei, Jetten ta bishita Curoil y e parke di biento di Aqualectra den cuadro di produccion di energia riba e isla.
