DEN HAAG  – Recientemente un cantidad grandi di alrededor di 6500 persona, e comunidad Arubano na Hulanda a celebra nan Dia di Himno y Bandera, Arubadag Festival den Ahoy na Rotterdam. Un publico di mayoria Arubanonan di tur parti di Hulanda. Pero tambe hopi persona di otro islanan di Caribe y Hulandesnan Europeo a bin Ahoy pa gosa di musica y como cuminda tipico di Aruba.

Despues cu e MC nan Lyonel Dirks y Julie Julie a yama e publico bon bini e programa a cuminsa cu canto di nos himno nacional Aruba Dushi Tera pa e conocido cantante Jonathan Croes. Despues e agrupacion tipico cu ta consisti di musiconan bibando na Hulanda, Saborrr a deleita e publico cu un repertorio masha varia mes. Popcorn Dancers a pone un show di baile bunita den otro, cu a consisti di baile folklorico te cu baile moderno. Grandama Cultural 2019 Nyohmi van der Biezen a duna un presentacion hopi bunita acompaña pa e bailadonan di Popcorn Dancers.

Ganadornan Un Canto pa nos Himno y Bandera Maryanjoli Rodriguez y Jerwin Hernandez a presenta cu nan cancion ganado Grupo di Betico celebrando nan mas cu di 50 aña di existencia a lanta e publico na comienso cu nan hit grandi “Alegria”. E musica tipico di Grupo di Betico un biaha mas a cay na agrado di tur e Arubanonan presente den Ahoy. Como artista invita nan a acompaña Reina di Dande 2018 Charella Lopes.

Svetlaine van Trigt cu ta Reina di Carnaval pa “People’s Choice” 2019 pa e Zomercarnaval na Rotterdan a presenta su mes na e publico cu un tremendo show carnavalesco.

E parti cultural a keda cera pa discurso di presidente di comision Arubadag Festival 2019 Glenn Ling y minister plenipotenciario Guillfred Besaril. Prome Minister di Aruba Evelyn Wever-Croes cu no por tabata presenta a manda un mensahe pa tur e Arubanonan via di un video cu a keda proyecta riba e dos screennan den e sala.

Despues di e discursonan, musica di brass band a habri e caminda pa e parti festivo. Te cu laat den anochi un seleccion di artistanan grandi di Aruba manera AtaNiro La Leyenda y Honeypot a pone Ahoy swing. Tur expectativa tabata dirigi riba e orguyo Arubano Jeon cu a presenta cu Upgrade Music. Bou un aplauso grandi di e publico Jeon a brinda un show riba un nivel hopi halto, manera nos por a spera di un artista internacional.

Mas e anochi ta transcuri e publico tabata pidi pa mas y esey ta exacto loke nan a haya cu Oreo. Claudius Philips keto bay ta sa di lanta e publico cu su musica y hitnan, manera Saka e Boom Boom. T-money a join Oreo pa asina e interpreta su Soca ganado di Carnaval 65.

E honor pa a cera Arubadag Festival 2019 a toca na e banda D’-Licious, cu ademas di nan propio repertorio tambe a acompaña Rey di Tumba Rocco Franken y Caiso winner Lady Ambiance.

Na final coordinador di Arubadag Festival a gradici e comision organisado, partner Quisunt, e sponsornan y e medionan di comunicacion pa nan aporte na un Arubadag Festival sumamente exitoso den Ahoy Rotterdam.

Minister plenipotenciario Guillfred Besaril ta sumamente contento y orguyoso cu Arubahuis conhuntamente cu partnernan a brinda nos comunidad Arubano un Arubadag Festival di kita sombre.