E siman aki, un medio di comunicacion local a publica tocante e suspension di Joselin Croes for di su funcion como director di Arubahuis. Croes mes a confirma e noticia aki na otro portal noticiero local, sin cu por a duna mas detaye di e motibonan tras di e decision di gobierno. Mientras tanto, e minister encarga no a sali duna ningun splicacion ni claridad.

Manera a keda reporta anteriormente e siman aki, un investigacion interno di gobierno a conduci na suspension di Joselin Croes for di su funcion como Director di Arubahuis, segun informacion publica pa un medio di comunicacion local. E suspension supuestamente ser emiti mientras cu e investigacion ta andando ainda, pero mas informacion detaya tocante esaki y motibonan specifico tras di e decision no por a ser confirma pa Bon Dia Aruba.

Segun informacion di e medio local, e medida a ser tuma bao autoridad di minister di Relacionnan di Reino, Gerlien Croes (Futuro), siguiendo un proceso hiba pa Departamento di Recurso Humano (DRH). Como parti di e suspension, segun informacion, a prohibi Joselin Croes di eherce su cargo, y hasta a prohibie di drenta cualkier edificio di gobierno.

Despues di papia cu Joselin Croes mes, otro medio di comunicacion local a indica cu e no por a duna mas detaye tocante kico a impulsa e investigacion, of di kico e ta trata, “te ora cu su caso bin dilanti.”

Mientras tanto, hurista di Arubahuis, Shandra John ta al mando di Arubahuis. Tambe tin indicacioncu Croes por a inicia accion huridico como contesta riba e schorsing, aunke esaki no a keda confirma oficialmente ainda. Es mas, niun di e detayenan aki a keda confirma oficialmente pa gobierno of autoridadnan concerni.

Bon Dia Aruba a manda pregunta por escrito pa minister di Relacionnan di Reino, Gerlien Croes, puntrando si e por confirma si e informacion ta corecto, kico ta e motibo di e suspension y si a nombra un director interino pa Arubahuis caba. For di comienso di siman, no a ricibi respuesta.

E situacion ya caba tabatin consecuencia practico pa representacion di Aruba den exterior. Durante un reunion extraordinario recien di Conseho di Minister di Reino na Den Haag—caminda ministernan plenipotenciario di Aruba, Corsou y Sint Maarten ta ser invita pa comparti nan perspectiva riba asuntonan regional y na nivel di Reino—Croes, ken ta representa Aruba pa motibo cu te ainda Gabinete AVP-FUTURO no a nombra un minister plenipotenciario, no por tabata presente. Den ausencia di Croes, Shandra John a atende e reunion den nomber di Aruba.

Joselin Croes a keda nombra director di Arubahuis na december 2023 despues di un proceso di seleccion largo y competitivo. E proceso a encera varios ronda di screening, incluyendo control di antecedente, y a resulta den nombramento di Croes como e candidato mas adecua. Su nombramento a keda aproba finalmente pa Conseho di Minister.

Prome cu el a asumi su rol na Den Haag, Croes a fungi como minister Plenipotenciario di Aruba na Washington, D.C. di 2018 pa 2023. Durante henter su carera, el a ocupa varios posicion den gobierno y riba tereno huridico y a ser considera como un diplomatico experiencia cu conocemento amplio di relacionnan di Reino.

Por lo pronto Arubahuis ta keda sin un director activo mientras cu e investigacion ta sigui.

Minister Plenipotenciario

Tampoco Aruba ta conta actualmente cu un minister Plenipotenciario na Hulanda. Por recorda con na inicio di formacion di Gabinete AVP-Futuro, despues cu e nombramento di Sra. Desiree Croes no a ricibi sosten di e coalicion, intencion tabata pa minister Rene Herde asumi e funcion na Hulanda. Sinembargo, despues cu Sr. Mike de Meza no a pasa su screeening pa minister, a nombra Herde den su posicion actual como minister di Infrastructura, energia y telecomunicacion, lagando e posicion di Minister Plenipotenciario na Hulanda bashi. Gobierno a anuncia cu intencion ta pa laga e posicion bashi pa un tempo.

Esaki ta nifica cu Aruba actualmente no tin ningun representacion formal permanente na Hulanda.