Ayera gobierno demisionario di Hulanda a anuncia cu Conseho di Minister a aproba e nombramento di Sr. Mauritsz de Kort como Gobernador di Corsou. De Kort, ken a nace na Aruba, ta bira sucesor di e Gobernador actual, Su Excelencia Sra. Lucille George-Wout, kende su di dos periodo como Gobernador ta caduca dia 4 di november. E nombramento di Sr. De Kort ta pa un periodo di seis aña y lo drenta na vigor dia 4 di november 2025.
Sr. Mauritsz de Kort di 51 aña di edad actualmente ta fungi como Presidente di Corte Comun di Husticia di Aruba, Corsou, Sint Maarten y di Boneiro, Sint Eustatius y Saba desde 2022. Anteriormente, entre 2017 y 2022, Sr. De Kort tabata miembro di directiva di Corte Comun como vice-presidente di Sucursalnan di Corsou y Boneiro.
El a cuminsa su carera como abogado na bufetenan di abogado na Corsou, Sint Maarten y Aruba y ta hues desde 2011. El a studia na entre otro Universidad di Leiden y Universidad di Londres. Durante su carera el a ocupa diferente funcion di maneho na organisacionnan cultural y social na Corsou y Sint Maarten.
Como Gobernador di Corsou, Su Excelencia De Kort ta representa Rey y ta den e funcion ey ta e cabes di gobernacion di Corsou, y e ministernan ta responsabel na e Parlamento di Corsou pa e accionnan di Gobernador. Como organo di Reino, Gobernador ta representa gobierno di Reino.
