Hoben Arubiano Mariël Willems ta den e finalistanan di e competencia culinario hubenil mas renombra di mundo, e IIHM International Young Chef Olympiad, YCO. Willems despues di a gradua di EPI, a bay studia aña pasa na Lucerne, Suisa, pa sigui cu su educacion superior na e facultad culinario di e Business and Hotel Management School, B.H.M.S na Lucerne, Suisa.
B.H.M.S ta participa regularmente na e YCO y su representante ta e studiante cu gana e competencia na Suisa. Y e ganado tabata Mariël Willems.
E competencia YCO ta pa celebra e diversidad y multiculturalismo den cuminda rond mundo. E ta e di siete edicion, cu pa motibo di e pandemia a dicidi pa haci esaki virtualmente. Un total di 50 pais a participa, incluso Suisa, representa pa un Arubiano.
E competencia, organisa pa e International Institute of Hotel Management cu su base na India, hunto cu e International Hospitality Council London, a cuminza Diadomingo ultimo. E ta encera dos ronda di reto culinario den nan intento pa gana e trofeo ademas di un premio di 10 mil dollar, y tambe reconocimento di nan habilidad for di expertonan renombra di e industria culinario y di hospitalidad.
Cada participante mester prepara su plato den su propio cushina, unda e mester prepara cada un di e tres platonan den e tempo prescribi, unda e hurado lo por mira henter e proceso. Entre e hurado ta chefnan renombra manera Chef John Wood di Reino Uni; Chef Andreas Muller di Hong Kong y Chef Enzo Oliveri di Italia.
Mariël Willems ya a pasa un di e retonan y ta den e finalistanan pa e premio. E competencia ta inclui otro premio, por ehempel ‘Miho Plato Vegetariano’ ‘Miho Practica di Higiena y Cushina’ y ‘Premio di Sostenibilidad.’
