– Director di Arubus, Theo Croes a indica cu e situacion financiero di e compania estatal aki ta uno dificil, pero tampoco hopi dificil cu nan no por sobrevivi tur luna cu e entrada cu nan ta genera actualmente.
Segun Sr. Croes, nan tin un cash flow cu ta suficiente pa mantene y garantisa nan operacion. “Nos no ta den e situacion cu nos no ta paga nada.” Pero di otro banda nan tin inversion y debenan cu nan mester paga bek.
Sr. Croes a revela cu Arubus a haya un fiansa caba, pero nan no a tum’e ainda. E fiansa aki ta pa paga bek e balor di e mashinnan di parkeermeter. E ta un inversion di 2.2 miyon cu Aruparking mester paga bek na Arubus.
Plan parkeermeter hotel ta pendiente
E ta bisa cu sin duda e ultimo cambio pa flexibilisa un biaha mas e orario di Aruparking lo tin su efecto financiero pa nan. Sr. Croes a indica cu lo bin cu algun plan pa compensa e perdida di entrada aki. Nan ta deliberando con lo haci e parti aki pa genera entrada; y nan tin diferente plan pa haci esey, el a bisa. Tambe e posibilidad di instala e parkeermeter den e area hotelero, pero esaki ta un plan cu ta pendiente ainda.
Segun director di Arubus e meta principal di Aruparking tabata pa crea accesibilidad pa parkeer den centro di ciudad pa e clientenan por parkeer mas cerca di e tiendanan posibel. Otro meta tabatin di haber cu siguridad y ambos meta a keda cumpli. Sinembargo ora cu e sistema di meter parkeer a keda introduci a wordo bisa cu e meta tabata pa genera entrada pa e compania di transporte publico aki, ya cu nan tabata den un situacion financiero dificil y pa sigui ofrece su servicio social y subsidia cerca entre otro nos pensionadonan, mester genera entrada extra pa medio di parkeer meter.
