Ayera Arubus a introduci un ruta nobo cual lo bay facilita tur usuario di bus cu ta bishita MFA Paradera pa haci cualkier transaccion. E ruta aki manera mayoria di nan busnan lo sali for di stacion grandi Oranjestad y lo ta bayendo direccion MFA Paradera.
E ruta exacto pa direccion Paradera lo ta saliendo for di satacion di bus na Oranjestad, Weststraat J.G, Emanstraat, Hendrickstraat, Caya Ernesto Petronia, De la Salle Straat te na rotonde Sero Blanco, rotonde Paardenbaistraat, Paardenbaaistraat, Arubus stacion Oranjestad. Ora di bay bek lo ta basicamente e mesun ruta cu e unico diferencia: na altura di misa di Playa, lo bay Koningstraat te na rotonde di Paardenbaaistraat y bay bek Arubus. E bus aki lo ta coriendo dialuna pa diabierna segun e schedule, cual ta igual na e dianan di operacion di MFA Paradera.
Cu e servicio nobo aki, Arubus kier a invita Aruba completo pa probecha e oportunidad aki na momento cu mester bay MFA Paradera pa haci cualkier tipo di transaccion. E bus aki ta un bus cu servicio di Arubus y manera custumber, por paga uzando smartcard di Arubus di 3 florin, of tambe pagando cash 4,50.
E bus lo core cada ora cuminsando 7:30am anto cada 10 minuut prome cu ora lo ta regresando bek pa stacion Oranjestad. “Nos a cuminsa cu e orarionan aki anto nos lo analisa esaki durante e prome lunanan. Na momento cu si nos nota cu esakinan lo ta dificil pa logra, lo haci ahustacionnan pero pa aworaki esaki ta e ruta”, vocero di Arubus, Sanin Daou ta comenta. Pa mas informacion por bay online riba e pagina arubus.com.
Segun sr. Daou, Arubus a haya diferente peticion di hendenan cu kier bini MFA Paradera no tin auto di nan mes. Na e momento aki ta cuminsando cu bus chikito. Manager na MFA Paradera, Elton Hart: “E cantidad di hende cu ta bin uza e servicionan na MFA ta varia pero bo ta papiando di mas o menos 5.000 pa 7.000 cliente cu ta haci uzo di servicio di solamente Hulpbestuurskantoor y belasting pa luna.” Esey ta excluyendo e servicio pa huur e sala di ariba y abao, sin conta e bibliotheek tambe.
