Tur aña, Arugas ta ehecuta trabaonan di mantencion ariba su ekipo pa mantene un operacion sigur y eficiente. E aña aki a yega e turno pa haci mantencion rutinario ariba e tanki di awa.
Seguridad ta prioridad pa Arugas, y pa garantisa cu semper tin awa disponibel durante e trabao, Arugas a acerca Cuerpo di Bombero y CMO pa traha un plan di contingencia. E plan ta enfoca riba mantene disponibilidad di awa na tereno di Arugas pa cualkier eventualidad.
Dia 1 di october, e ekipo di Cuerpo di Bombero conhuntamente cu oficina di CMO a presenta na planta di Arugas pa ehecuta e plan di contingencia. Nan a staciona un truck y instala slangnan preventivamente. E ekipo di Cuerpo di Bombero lo keda na Arugas durante e periodo cu e tanki ta pafor di servicio pa su mantencion.
Arugas ta agradecido pa e excelente cooperacion cu e profesionalnan di Cuerpo di Bombero y CMO, y ta reconoce e compromiso pa siguridad y servicio continuo.
Durante e trabaonan di mantencion, Arugas ta habri normal pa atende tur cliente cu mester gas, instalacion di gas, y articulonan na benta den e showroom.
Pa Arugas e seguridad di su empleado, cliente y henter comunidad di Aruba ta na prome lugar.
