Ayera mainta durante un conferencia di prensa, minister di Husticia, Integracion y Transporte Publico, Arthur Dowers a brinda un actualisacion pa loke ta trata operacion di Aruparking, en conexion cu nan di 10 aniversario.
Minister Dowers a splica cu manera ta conoci Aruparking ta un compania cu a ser lanta door di gobierno tempo cu e mes tabata den Conseho di Minister como minister di husticia. E tempo ey gobierno a scoge pa lanta un compania cu ta garantisa cu parkeo den centro di ciudad lo bira mas accesibel pa henter e comunidad.
El a sigui splica cu den e ultimo 10 aña Aruparking a conoce diferente obstaculo y e hecho cu ya e compania ta funcionando pa 10 aña ta necesario pa realisa un analisa pa gobierno mira con ta mehora e procesonan di e compania.
El a remarca cu presion den centro di ciudad ta creciente y manera por mira tin diferente proyecto andando na e momento aki pa aumenta e presencia di mas hende den e centro di ciudad. Esaki, el a indica, ta nifica cu ta bay yega un momento cu mas hende ta bay biba den centro di ciudad, mas hende ta bay bishita e centro di ciudad y esey tambe ta nifica cu lo mester regula e espacionan cu tin. “Si no haci esey ta bay haya problema y confrontacion entre hendenan na dado momento den comunidad y a costa di tur cos mester preveni esey,” el a señala.
E mandatario a splica cu gobierno ta bay haci esfuerso pa e proyecto haya su contenido cu e mester a haya di berdad ya cu den pasado, na momento cu a start e proyecto tabatin cierto proceso cu su mes e tempo ey como minister a haya cu nan tabata un tiki mucho pisa pa cuminsa un proyecto. El a indica cu aworaki nan ta evaluando tur e procesonan ey y lo anuncia e procesonan nobo na comunidad segun cu nan tuma pasonan nobo.
Minister Dowers a manda un advertencia si na henter comunidad. El a enfatisa cu aunke Aruparking a para cierto control cu tabata ser realisa y klemmento di auto, despues di combersacionnan cu a tuma Cuerpo Policial ta bay atende cu e hendenan cu no ta comporta nan mes di e forma cu mester pa loke ta trata e uso di espacionan den cierto partinan di e ciudad.
El a splica cu mas cu claro tin espacionan pa parkeer, pero tin hopi espacio cu no ta di parkeo, por ehempel caminda peatonnan mester por move of caminda cu pa motibo di seguridad no por para auto, pero toch ta mira cu tin autonan para. “Si e hulpdienstnan, por ehempel brandweer of ambulance mester yega cierto luga lihe, e ta haci imposibel pa nan por yega. Esey nan ta bay ser atendi cune den e simannan binidero, cual ta un proceso los di Aruparking,” el a informa.
Manager di Aruparking, Channela Maldonado, a splica cu ora Aruparking a cuminsa na 2015 e meta tabata simpel: crea orden den Oranjestad; crea accesibilidad den Oranjestad; y aporta na un miho fluho di trafico den Oranjestad.
El a sigui splica cu durante e ultimo 10 aña Aruparking a sa di innova. Na comienso por a paga solamente cu florin pa parkeer, pero awendia por usa carchi di banco of usa e app di pay.aw, cual el a indica ta hopi usa pa e clientenan, haciendo e proceso pa paga parkeer uno hopi mas facil. “Aruparking ta den un transicion nobo unda ta crea mas flexibilidad pa e usuarionan,” el a remarca.
Representante di Aruparking a anuncia cu pronto e compania lo cambia su maneho operacional. El a splica cu actualmente Aruparking ta haci uso di un sistema caminda cu ta paga pa e parkeervak y ta usa e letter y number di e parkeervak pa paga pa por parkeer auto.
Pronto lo cambia pa un sistema unda cu e usuario lo usa su nummerplaat. El a splica cu e usuario lo bay na e mashin y en bes di yena e parkeervak unda el a para nan auto, e lo yena e nummerplaat di e vehiculo. El a indica cu e cambio ta ser haci pa duna e usuario libertad pa por move den Oranjestad den cualkier parkeervak blanco, basta cu ta dentro di e orario cu el a paga p’e locual nan ta premira lo facilita e proceso pa nan clientela. “Di e forma aki Aruparking ta purba maximalisa e balor di e producto cu nos ta brinda na pueblo di Aruba,” el a remarca.
E representante a indica cu e trabou di control tambe lo cambia un poco. E personanan cu ta encarga cu haci e trabou di control lo haya aparatonan di man pa scan e nummerplaat di e autonan pa determina si e parkeo ta paga of no.
“E esfuersonan aki y trabounan di control ta ser haci pa mantene orden den Oranjestad pa loke ta trata parkeo,” el a enfatisa.
El a agrega cu pa por efectua e cambionan aki e cambio di ley mester ser trata y efectua.
En conexion cu Aruparking su di 10 aniversario dia 3 di september proximo, e compania ta lansa un campaña pa mustra aprecio y gradicimento na e pueblo di Aruba. E representante a splica cu lo tin premio cu lo ser reparti pa usuarionan di Aruparking y tur usuario por participa den e campaña y tin tres manera pa participa.
E prome manera pa participa ta door di paga pa parkeo den un di e vaknan blanco den Oranjestad na un di e mashinnan. E mashin ta duna un recibo y riba esaki ta skirbi nomber y number di telefon y ta entrega e recibo na oficina di Aruparking.
Di dos manera pa participa ta door di paga pa parkeo usando e app pay.aw. Unabes cu haci esaki via e app, e participacion den e campaña ta automatico den e campaña. E di tres manera pa participa ta pa e usuarionan cu ta haci uso di permiso di parkeo. E rekisito pa participa ta cu pagonan mester ta actualisa. Ganadoronan lo ser saca fin di juli y augustus, y dia 3 di september e campaña ta termina y lo saca e ultimo ganadornan.
