Den dianan aki a bin dilanti hopi discusion tocante e ex-miembro di partido politico AVP, ken riba dia 21 di april a haci oficial su independencia di e partido aki, indicando cu e ta bay keda den parlamento pero como un parlamentario independiente.

Prome disputa pa asiento a cuminsa na 1988 na Aruba cu a yega te Corte Supremo di Reino

Caso Partido Democratico Arubano (PDA) a cera un acuerdo pa e eleccion di Eilandsraad Aruba cu nan candidatonan. E acuerdo aki ta nifica cu nan candidatonan ta bay entrega nan stoel di parlamento cu nan obtene, despues cu nan ta renuncia for di afiliacion di PDA. E stoelnan ta cay e ora den man di e partido.

Corte Supremo a dicta cu e acuerdo aki ta nulo, pasobra e ta bay contra e principio di vrijmandaat di miembronan di Staten cu ta regla den Statuut di Reino y no ta necesario pa cumpli cu e acuerdo. Ademas, Corte Supremo a dicta cu e reglanan den e Kiesreglement tin hopi importancia publico; pa esaki no por a palabra un acuerdo. Pa e motibo aki, tambe ta considera e afspraak di Partido Democratico Arubano (PDA) como nulo.

Disputa den partido (MAS): esun cu haya mas voto ta drenta parlamento

Caso Movemento Arubano Soberano (MAS) a firma un protocol prome cu eleccion 2021, cu ta bisa den nan punto 5: “suscrito y partido MAS ta sostene e principio democratico cu e candidatonan cu haya mayor cantidad di voto ta prome yama pa bira representante di pueblo.” Dos punto importante ta cu e contract semper tabata nulo y tampoco partido MAS no a cumpli cu su supuesto contract, mirando cu nan a laga Solangel Dinmohamed-Lacle afo, siendo cu e la haya mas voto cu Aquannette A. Gunn.

Ryçond Santos do Nascimento ta bira parlamentario independiente

Den ultimo dianan door di diferente hecho cu a sucede den partido AVP, a bira conoci cu un miembro di partido berde a tuma e decision di bira parlamentario independiente, esta Ryçond Santos do Nascimento. Siman pasa el a tene un conferencia di prensa pa informa comunidad tocante su decision. Ademas el a publica un carta dirigi na presidente di Parlamento di Aruba. Ademas den un post riba su red social el a indica lo siguiente:

“Het vrijmandaat ta nifica cu tur derecho constitucional di un representante di Pueblo ta asigna na e representante ey personalmente y no na su fraccion, partido of cualkier otro persona.

E derecho di haci pregunta por escrito of verbalmente, e derecho pa vota riba un mocion of un proyecto di ley y e derecho pa mantene of renuncia boluntariamente su asiento ta pertenece inalienablemente na e representante di Pueblo. E vrijmandaat aki ta sigura cu un parlamentario por haci su trabao segun su consenshi.”

Parlamentarionan cu a bira independiente

Na aña 2011, Marisol Lopez-Tromp y Mervin Wyatt Ras tabata forma parti di partido Movemento Electoral di Pueblo (MEP). Na e momento ey ambos a vota contra e recorte di pension y tambe pa eleva e edad di pension di minister y parlamentario, loke a culmina cu nan expulsion for di e partido. Den e mesun aña, Candelario (Booshi) Wever tambe a dicidi di bandona e partido geel y bira independiente.

Na aña 2013, Arondino Croes tambe a distancia di e partido MEP.

Na 2016, Marisol Lopez-Tromp un biaha mas a dicidi di aleha su mes for di otro partido, den e caso aki di AVP, ora un incidente cu Chris Dammers a tuma luga caminda el a keda un aña como independiente.

Na september di aña 2019, Daphne Lejuez a tuma e mesun decision ora e tabata forma parti de partido geel. Esaki tabata pa motibo di e ley tocante e situacion financiero cu gobierno a enfrenta cune. Su decision no tabata pa bira oposicion tampoco, sino pa “brinda libertad pa contribui na un forma mas balansa, obhetivo y husto na interes di nos pais.”

Finalmente, siman pasa https://www.facebook.com/rycond?__cft__%5b0%5d=AZXTVHqIwvSIsV72U9loZK706YB3HqsZcHAjTrPHFiFHErn_KilpebIpRHXMBhp96VDowYM-HjmOPGp_BDUVTLkrm-HaAaEz5VRP7EIE-JaIkCxaLQsrSjaOpwPWFwOFXPoYkpHw_5KekkS-XnOLUtJyoYj6Bus8dC7jJmnSQ1bcWwDAffaU_73SJTbjm3LyOJk&__tn__=-UC%2CP-RRyçond Santos do Nascimento a haci publico su renuncia despues di diferente situacion cu a tuma luga den seno di partido berde.

Awor e incertidumbre ta keda pa loke ta trata Gerlien Croes, ken despues di vocifera su malcontento cu partido AVP diabierna ultimo den un conferencia di prensa, a sigura cu e ta pidi comprension y espacio pa e por bay combersa cu su famia y sostenedonan pa evalua si e ta keda of e ta bay di e partido berde.

Croes ta sigui keda como miembro di partido AVP, aunke tambe ta sigui keda considera como un falta di respet cu e no a haya invitacion pa un reunion, manera el a menciona caba. Tin diferencia di opinion y den esey tin emocionnan, “pero esey no ta descarta cu nos ta politiconan. Nos ta hende grandi y nos mester tin respet pa otro den mundo aki. Esey ta e caminda cu mi ta sinti, pero na e momento aki ora bo tin emocion, e decisionnan mester tuma racional y no a base di emocion,” el a bisa.

Tambe el a declara cu si e tuma un decision ta na bienestar na final di dia di un cambio den politica na Aruba. Comunidad ta continua na espera di ki decision e ta bay tuma.