Ya caba nos ta cerando e ultimo dianan di october. E di 10 luna di un aña cu pandemia di Covid-19 a dal henter mundo. Y pa loke ta nos industria di turismo, directora di Aruba Tourism Authority (ATA), Ronella Tjin Asjoe-Croes a referi na e proyeccion cu nan a yega di haci pa e luna di october y kico nan a monitor.

Mirando e proyeccion y e diferente escenario entre optimista, conservativo, y esun cu realmente nos a ricibi, e ehecutivo di turismo ta mira un adelanto na luna di october compara cu luna di september, unda nan a mira un bahada. E ta haya cu esaki ta bay man de man cu e hecho cu menos caso positivo a keda registra di Covid na Aruba. Esaki a trece cune un adelanto den turismo, kiermen mas persona cu ta bishita nos isla.

Pero e di dos aspecto cu el a remarca cu e resultado di october ta proyecta di ta bao escenario te hasta conservativo, y e no ta cerca di esun optimista. Pa ATA esaki ta keda un preocupacion pa nan. Ya cu nan ta pushando pa nos por ta entre e escenario conservativo y esun optimista, pero no bao di esaki.

Stimula turismo

Tur esaki ta pone pensa hunto cu otro socionan kico nan por haci pa stimula ingreso di bishitantenan teniendo na cuenta e presencia di Covid, pa asina stimula nos economia.

Nan a bin cu diferente paso pa stimula turismo y nos economia: E reapertura di e mercado di Latino America, Centro America, Mexico, Republica Dominicana y Haiti. Eliminacion di e hot zone na Merca. Y tambe reduccion di e tarifa di e seguro pa bishitantenan.

Directora di ATA a laga sa cu pronto nan lo ta anunciando un colaboracion cu diferente aerolinea mas grandi di Merca. E companianan aki lo bay ofrece como servicio adicional na nan clientenan, e habilidad di por regla e test cu ta wordo rekeri pa Aruba conforme nos rekisitonan. E ta haya cu e ta un ayudo grandi, ya cu esaki ta keda e drempel mas grandi te ainda. No solamente e test, pero mas bien e hecho cu e persona tin cu hacie denter di tres dia y entrega e resultado den e periodo aki.

Mas reapertura… mas turista

Un decision cu nan a tuma y cu a keda anuncia dialuna ultimo anochi durante e conferencia di crisis team ta esun cu e mercado di Sur America, Centro America (Mexico), Republica Dominicana y Haiti ta habri entrante 1 di december venidero.

El a bisa cu a wordo delinea un maneho prudente pa e regionnan y e paisnan aki. E reapertura aki, pero principalmente pensando den Latino America, lo por conduci na un total di 2 mil pa 2500 bishitante adicional na luna di december. “Cada cifra y cada empuhe cu nos por duna ta sumamente importante na e momentonan aki,” el a bisa. Ya caba nan proyeccion cu pa 2021 por mira entre 2300 pa 2800 turista pa luna.

Aunke e ta referi na turistanan, pero e ta evidente cu e destinacion di Latino America ta uno masha spera mes pa nos hendenan local mes, specialmente pa Colombia, pero tambe Republica Dominicana y Haiti. Esaki ta trece cune un adelanto den biahenan di nos residente mes pa e paisnan aki. El a remarca cu maneho di test y rekisitonan ta keda vigente.

Hot zone y seguro

Otro paso cu nan ta considera pa stimula ingreso di turista y asina impulsa nos economia, tin di haci cu nos mercado primario, esta Merca.

Ora Aruba a bin cu su reapertura pa Merca a haci un distincion entre mercado cu nan ta categorisa como hot zone y no hot zone a base diferente analisis haci pa e cluster medico. Nan a dicidi pa categorisa Merca como un pais, kiermen no ta bay tin hot zone mas, entrante otro siman.

E impacto di e decision aki y considerando importancia di Merca pa nos turismo, ATA ta proyecta cu e ta conduci na un total di 7 mil bishitante pa cada luna di november y december. E cifra aki por ta diferente, pero esaki ta na base di un analisis cu nan a haci na ATA.

Encuanto reduccion di e seguro pa bishitantenan, director di ATA a bisa cu Aruba ta un di e paisnan cu esaki ta obligatorio. El a trece como ehempel cu pa un siman di estadia na Aruba cada persona ta paga 70 dollar. Aworaki esaki ta bira 30 dollar pa tur esnan cu ta bishita nos isla y no ta importa con largo e bishitante lo keda. E pakete di seguro ta keda mesun cos cu tur su componente cu tabatin ora cu e tarifa tabata na 70 dollar.

Na final directora di ATA a ripiti cu un aspecto importante pa garantisa e desaroyo di e activacion di nos principal sector economico ta nos comportacion, atendiendo nos mes na e reglanan stipula pa DVG. Pero tambe pa cada un di nos percura di duna lo miho di nos mes, pa loke ta trata servicio pa esnan cu ta dicidi pa haci un biahe den e temporada dificil actual debi na e pandemia. E ta haya cu esakinan ta e rekisitonan clave pa nos por tin un temporada halto y exito e lunanan venidero.