Recientemente Aruba Tourism Authority (ATA) a informa cu nan a realisa un estudio actualisa ariba e inventario di Short-Term Vacation Rentals na Aruba. Esaki ta un estudio cu ta inclui inventario di condominio existente y condominio cu actualmente ta na caminda pa realisacion, y un lista actualisa di lugar di estadia cu no ta un hotel, pero cu si ta disponibel pa e turista cu ta keda na Aruba pa un corto tempo.
A traves di nan pagina di Facebook a comparti e resultado di e estudio aki y segun nan a indica, e resultado di e estudio ta menciona cu den totalidad Aruba ta conta cu 3,748 unidad di Short-Term Vacation Rentals activo cu ta carga un capacidad di 17,321 persona.
E unidadnan aki a ser separa den categoria y e estudio ta indica cu e categoria di Vacation Homes ta conta cu un total di 675 unidad cu un capacidad di 4,598 persona; categoria Villas ta conta cu un total di 96 unidad cu un capacidad di 1,091 persona; categoria Apartments in a Complex ta conta cu un total di 914 unidad cu un capacidad di 2,994 persona; categoria Apartments & Guestshouses ta conta cu un total di 498 unidad cu un capacidad di 1,317 persona; categoria ‘Others’, cual ta tur acomodacion cu no ta cay bou di e categorianan menciona anteriormente ta conta cu un total di 254 unidad cu un capacidad di 766 persona; y por ultimo e categoria Condominio registra como un Short-Term Vacation Rental ta conta cu un total di 1,311 unidad cu un capacidad di 6,555 persona.
ATA ta indica cu segun e lista di e plataforma Transparent a conta cu un total di 1,060 unidad di condominio na Aruba, cual ta indica cu 60% di e inventario total di 1,748 condominio cu e estudio a bin ta detecta cu actualmente ta registra como Short-Term Vacation Rentals.
Nan ta remarca cu e feedback ricibi for di e mercado directo ta indica cu 70% di e condominio ta wordo incorpora den un ‘Rental Pool Program’. Actualmente tin 741 condominio cu ta den ‘pipeline’, cual ta nifica cu nan ta den construccion y ta na caminda pa finalisa e proyecto.
Nan a subraya cu ta importante pa nota cu ta asigna un espacio di 5% como posibilidad cu e cifra aki lo por a subi of baha teniendo na cuenta e periodo cu e realisa e estudio y te cu e tempo actual.
E organisacion ta remarca cu e iniciativa di e estudio strategico aki lo yuda na actualisa e impacto ora di cumpli cu e pronostico di inventario di camber pa e siguiente añanan binidero. Un inventario di camber cu ta consisti di Hotel y Short-Term Vacation Rental.
“ATA tin como meta pa brinda un perspectiva holistico cu no solamente ta anticipa trayectoria di inventario pa e destinacion, sino tambe ta tuma den consideracion e gastonan cu ta mara na e diferente nivel di fluho turistico. E informacion di dato presenta den e estudio ta crucial y ta hunga un papel esencial den e esfuerso integral di A.T.A. pa revisa e scenario di ‘Carrying Capacity’ pa Aruba, pa formulacion di conseho, y aportacion pa cu, entre otro, Aruba’s Ruimtelijke Ontwikkelingsplan,” nan a enfatisa.
