Diahuebs mainta ATA (Aruba Tourism Authority) a celebra e dia mundial di turismo cu un webinar unda tabatin como invitadonan special Minister di Salud Publico y Turismo, Sr. Dangui Oduber, Sra. Isha Tapias-Kock encarga cu Project Development na ATA, Sanju Luidens, Chief Marketing Officer na ATA y tambe e CEO di ATA, Sra. Ronella Croes.

Durante e programa e invitadonan cada un a reflexiona ariba e aña di e pandemia cu sigur tabata un reto y a elabora ariba e industria di turismo y nan vision pa futuro.

E prome invitado, Oduber a felicita y a expresa su gratitud na tur empleado cu ta traha den e industria, tur partner, tur e compania cu ta proporciona servicionan na tur e bishitantenan cu ta bishita Aruba. “Ariba e ocasion hopi special aki mi kier expresa mi gratitud t pa tur e esfuerso y contribucion pa nos industria di turismo y nos economia pasobra e ta significa hopi pa nos, como e ministerio di turismo ta aprecia tur e esfuerso cu ta wordo haci no solamente di parti di e empleadonan, e companianan, pero tambe di nos partnernan valioso cu ta haci e exito cu nos ta logrando durante e ultimo decada posibel”, el a bisa.

El a refleha ariba pandemia enfatisando e desafionan cu esaki a trece cune. “Nos a experiencia, mi ta kere pa prome biaha den historia, pa tin un isla sin ningun bishitante pa mas di tres luna y nos a sinti kico ta pa no tin e industria di turismo”, el a bisa. “E tabata dificil pa cuminsa ricibi turistanan atrobe, pero asina cu nos a habri nos frontera back na juli, cu e protocolnan cu nos a implementa, mi ta kere nos tur na Aruba por ta hopi contento cu tur e esfuersonan cu a wordo haci pa nos por beneficia exitosamente”.

Oduber a ricibi e pregunta, kico e lo kier su legado ta como minister di turismo y ariba esaki el a contesta cu e lo kier wordo recorda como e minister cu a crea e balans entre desaroyo y medio ambiente. El a splica cu como minister e kier mira mas desaroyo, pero e kier pa e desaroyonan aki ta sostenibel pa futuro. “Locual kiermen ta cu nos mester sigui proteha nos naturalesa, nos mester desaroyo, pero desaroyonan chikito, desaroyonan boutique style, no mas di 100 camber”, el a agrega.

El a splica cu e enfoke principal di e ministerio di turismo ta pa atrae clientenan di balor halto, e cliente cu tin un capacidad di gasto, e turista cu lo tin un impacto ariba e economia di Aruba sin tin e volumen di turista cu Aruba di wak den ultimo decada.

“Mi ta kere cu den e mundo di turismo cu nos ta biba aden actualmente, e ta importante pa nos enfoca ariba crecemento inclusivo. E beneficionan cu ta wordo crea door di e industria di turismo mester wordo sinti pa tur persona bibando den nos sociedad, esey ta e enfoke principal di nos vision, pa haci’e un trayecto exitoso pa e proximo 4 añanan y pa e futuro, cu tur hende por sinti e beneficionan di e mesun manera na Aruba”, el a remarca

Sra. Isha Tapias-Kock, encarga cu Project Development na ATA a elabora ariba e intencionnan di parti di ATA pa 2022 pa atrae mas turista na e isla. E ta splica cu ATA su enfoke ta ariba loke e turistanan kier, e experiencianan cu nan kier tin mientras nan ta na e isla. Pa sigura esaki ATA tin diferente proyectonan ariba mesa, manera e ‘Visitor Pro Management’. “Como un destinacion nos mester sigura cu e bishitantenan cu ta bin e isla tin e experiencia e alegria di ta akinan na Aruba y e visitor pro management ta duna nos e oportunidad pa tin un plan di con pa duna nan e miho oportunidad pa experiencia esey”, el a bisa.

Sra. Tapias-Kock ta splica tambe cu ATA kier sigura cu tur persona cu bishita e isla ta ricibi un servicio specifico standard. Na 2020 ATA a cuminsa cu e programa ‘Aruba Quality Seal’, pero pa motibo di e pandemia a stop e programa y a move pa e ‘Aruba Health and Happiness’, cual ta un programa di protocolnan di higiena y seguridad, pero drentando den 2022 ATA ta busca pa reinicia e programa di ‘Aruba Quality Seal’ atrobe.

“Nos mester sigura cu nos ta proporciona e necesidad ey pasobra aworaki esey no lo cambia y p’esey e programa di ‘Aruba Quality Seal’, biniendo back online, ta sigura cu tur persona operando ariba e isla tin un standard, un nivel di seguridad pa e bishitantenan, pero tambe un nivel di servicio y experiencia cu nos ta conoci pe como Arubiano”, el a señala.

Otro invitado ariba e programa tabata Sra. Sanju Luidens , ATA Chief Marketing Officer cu a splica e strategianan pa atrae e turistanan ‘High Value’ pa Aruba. El a splica cu na 2020 ora cu e pandemia a cuminsa, ATA a cambia nan strategia y a enfoca ariba kico tabata importante na e momento ey cual tabata informacion funcional. “Despues di e reapertura di e fronteranan nos mester a sigura cu nos tabata comunica na e momento corecto cu e mensahenan corecto”, el a bisa.

ATA ta busca pa atrae e tipo di turista cu no solamente ta e turista di ‘High Value’, pero tambe e turista cu ta den harmonia cu e balornan di Aruba. “Di un banda bo ta bay tras di e bishitante prospero, di un perspectiva demografico, bo kier sa kico e personanan aki kier ora nan ta di vakantie, dus esey ta loke nos ta buscando”, el a splica.

“Pero di otro banda, nos kier ta sigur cu nan ta den harmonia cu e balornan cu nos ta buscando, den harmonia cu nos naturalesa, den harmonia cu nos hendenan y den harmonia cu nos infrastructura, esey ta hopi importante tambe. Esey ta locual nos ta buscando aworaki y esey ta ariba loke e investigacion ta enfoca ariba dje, identifica e personanan aki, unda nan ta, ken nan ta y kico ta loke nan ta buscando”.

E ultimo invitado special di e celebracion special aki tabata e CEO di ATA, Sra. Ronella Croes, cu a cuminsa gradiciendo tur persona, partner y tur cu ta traha den e organisacion pa e trabou haci pa e turismo di Aruba. “Turismo ta parti di nos cultura, nos ta biba turismo tur dia den tur cos cu nos haci. Nos ta tuma un dia den e aña, dia di turismo, pa refleha ariba loke a pasa, logronan pero tambe e retonan, y pa tambe gradici tur hende, nos tin hopi pa ta orguyoso di dje, no solamente como miembronan di ATA pero como e comunidad completo. Den nomber di ATA pabien na esunnan cu ta traha den e organisacion, pero tambe na tur nos partnernan, e ta un dia pa elogia tur loke bo ta haci, pa gradici y felicita bo”, el a expresa.

Sra. Croes a splica cu aña pasa prome cu covid a keda declara como un pandemia, ATA a cuminsa cu un plan di 50 pagina cu diferente scenarionan di loke por ta un impacto potencial ariba e turismo di Aruba. Na e momento ey ta nan simula e momentonan di crisi mas grandi cu Aruba a pasa aden durante e añanan y esey a pone cu a bay back na 9/11 y Nathalie Halloway y rapidamente a realisa na cuminsamento di maart cu e crisis aki lo ta bay ta diferente biaha mas grandi cu 9/11.

“Na 2021 nos a traha cu 3 scenario. Un tabata cu un recuperacion di 40% di turismo den comparacion cu 2019, y e otro scenario extremo tabata cu un recuperacion di 60% y mi ta content pa bisa cu un aña despues, augustus, nos ta na un recuperacion di 65%.”, el a agrega.

Den termino di entrada genera pa turismo, el a splica cu e entrada directo calcula pa credito di turismo desde e frontera a habri atrobe, ta mira cu e turistanan ta gasta mas durante nan bishita compara cu aña 2019 y tendencia ey ta continua den 2021.

Pa loke kico ta den futuro pa ATA, el a bisa; “Nos a cuminsa cu nos planning, esaki ta plannan cu ta cambia frecuentemente, sinembargo aunke bo plannan tactico ta cambia, bo tin bo strategia, bo tin bo metanan y bo tin bo obhetivonan cu bo ta cuminsa traha pa yega na esakinan anualmente. Pero semper enfocando ariba e futuro”.