ORANJESTAD – Mientras cu na Aruba e situacion ta uno di expectativa y preocupacion riba kico lo por pasa den e pais bisiña di Venezuela, y cual lo ta e consecuencianan pa nos isla y e otro partnernan den Reino, gobierno di Aruba a laga sa cu nan ta tumando tur accion necesario pa cualkier eventualidad.

Unabes cu reino Hulandes a dicidi pa reconoce Juan Guaidó como presidente interino den e proceso di transicion aki, y no mas e regimen di Nicolas Maduro, ya e efectonan ta wordo sinti cu e decision di Venezuela di cera e espacio aereo y maritimo cu Aruba, y e otro islanan ABC (Bonaire y Corsou).

Cantidad di pasahero cu mester regresa na nan respectivo pais a keda tanto na Aruba como na Venezuela pa e decision unilateral y pa tempo indefini di e ceramento di e frontera aki. Sinembargo, prome minister Evelyn Wever-Croes a anuncia via WhatsApp cu nan preocupacion principal ta e grupo di Arubiano cu ta pega na Venezuela, y cu nan ta purbando pa trece nan bek den e proximo dianan.

Situacion di turismo
E mandatario a yega di bisa cu pa loke ta e situacion tenso cu Venezuela su efecto pa nos turismo, nos mercado mas grandi, cu ta Merca, e turista aki ta busca trankilidad. P’esey e ta reforsa su peticion na comunidad pa nos ta trankil. Pasobra nos turismo, cu ta e unico pilar economico, ta depende di e trankilidad cu nos por mustra como Rubiano den e situacion dificil aki.

“Si esey ta bay malo, e ta costa nos hopi mas cu locual ya caba nos ta pasando aden. Esey si ta bira un problema serio,” el a bisa. E mandatario a sigura cu Oficina di Turismo di Aruba (ATA) tin un unidad special riba e tema aki pa monitor comentario cu por tin na Merca.

Recientemente a circula un mensahe cu Departamento di Estado di Merca a duna e conseho pa no bin Aruba. Premier Wever-Croes a bisa cu e noticia aki tabata falso, ya cu e no tabata basa riba nada. Sinembargo, el a wordo publica den algun website na Merca, locual a causa nos daño. ATA a bin cu un plan di contingencia pa atende cu e asunto aki y e daño cu a ocasiona.

Bon Dia Aruba ta compronde cu gobierno di Aruba a bin cu un structura nacional, caminda tur cos concerni riba e situacion di Venezuela y su efecto pa Aruba, tur comunicacion ta wordo centralisa door di minister presidente.