Atakenan racista a afecta famia di Josephine Albertus; Presidente di SIMAR: Ta señal cu mi ta haci mi trabao

“Mi mes a keda sorprendi, mi no a spera cu e lo a haya asina atencion.” Esey tabata comentario di Josephine Albertus riba e hecho cu su decision pa bay traha na Boneiro a bira noticia.

Particularmente pasobra tur cos a bay asina liher. Ta apenas tres siman pasa henter e proceso a cuminza. Tabata su tata kende a bisa Josephine cu tin un vacatura na Boneiro y a sugeri pa e solicita p’e. Motibo pakico su tata tabata busca algo pa su yiu ta tur e atakenan racista cu nan tabata mira nan yiu pasa den dje na Aruba, pa motibo di ta haci su trabao como Presidente di e sindicato di maestro, SIMAR.

“Mi tata a bisa pa wak e vacatura, pasobra ultimamente e atakenan discriminatorio, manera hendenan tabata papia riba Facebook, tabata haci mi mayornan hopi dolor. Ami mes e no tabata afecta, mi no tabata worry. Mi tabata sa cu ora e atakenan (racista) bin, ta pasobra mi tabata haci mi trabao bon. Pero e tabata dolor pa mi mayornan. P’esey mes, ora mi tata a urgi mi pa aplica, mi a hacie.”

Den un siman despues di manda su aplicacion, Albertus a ricibi un reaccion pa pidie pa nan por papia cune. Despues a sigui un combersacion y e mesun dia, apenas 15 minuut despues cu a caba cu e combersacion, Josephine Albertus a ricibi e yamada unda ta ofrece e funcion di lider di ekipo di e seccion di VWO na Boneiro.

“Asina el a sucede. Un periodo hopi cortico.” Albertus no a solicita pa miho condicion di trabao, sino pa sali di un ambiente asina negativo na Aruba. Sinembargo, un punto cu sigur ta traha como estimulo pa bay Boneiro ta e condicionnan di trabao. “Mi ta bay hopi dilanti den salario. Mi ta haya 13 luna di salario riba dje. Ademas, na Aruba, asina cu cumpli 38 aña, como docente ya no por crece mas den beneficio y salario. Pero esey no ta e caso na Boneiro (cu ta un municipio di Hulanda). Mi por a negocia mi salario y ainda mi oportunidad pa sigui crece.” Den otro palabra, Albertus ta admiti cu e funcion nobo ta dun’e oportunidad pa bay dilanti economicamente.

Sinembargo, locual pa Josephine Albertus ta mas importante ta cu e cambio di Aruba pa Boneiro ta otro paso den direccion di desaroyo continuo. “Ami semper tabata un hende cu kier desaroya mi mes pa bay dilanti. Aki na SIMAR mi a yega mi maximo. Mi a traha cuater aña cu hopi dedicacion y pasion. Pues awor ta tempo pa mi sigui avansa mi carera.” Oportunidadnan manera esun na Boneiro riba dje no ta bin asina lihe y como tal, e no por a lag’e para. “Mi a pens’e bon. Mi a papi’e cu mi famia y nan a sostene y asina nos a dicidi pa haci e paso hunto.”

Gobierno

SIMAR tabata literalmente den cara di Gobierno for di momento cu Josephine Albertus a tuma cargo y el a bira mas intenso cu e recorte di 12.6 porciento. “Semper, unda mi traha, tambe na Hulanda, mi ta duna 100 porciento of mas di mi mes. Esey ma haci na Aruba tambe. P’esey, ora cu mi a mira algo cu ta perhudica mi ‘veld’ mi ta sali p’e.”

Y hopi hende a critik’e door cu e ta bin dilanti pa hopi tema, cu no necesariamente tin di haci cu condicion laboral di docentenan. “Pero mi tin cu sali pa esnan cu mi ta representa y den statuut di SIMAR ta poni cu mi mester traha na bienestar di e miembronan, mester traha na bienestar di enseñansa den su totalidad y mi tin e deber pa traha pa e derecho di pueblo den su totalidad, tanto riba e parti cultural y social. Y mi tin e deber como Presidente di SIMAR pa sigui progresa cu e sindicalismo. Pues tin cuater punto den e statuut cu mi a eherce e miho cu mi tabata por. P’esey mes tin biaha mi tabata sali den prensa riba temanan cu no necesariamente tin di haber cu enseñansa, pero si cu necesidad di pueblo.”

E atakenan racista cu el a haya, e no ta tuma nan como tal, sino mas bien como un forma baho di reacciona riba kico e ta logrando. Mas atake e tabata haya, mas e tabata realisa cu e tabata haci su trabao na bon forma.

Y den e proceso di dirigi SIMAR, Albertus tabata busca conocemento no solamente na Aruba, pero tambe den exterior pa mira cua ta e miho formanan pa yega na e obhetivo. “Mi a purba semper pa encurasha mi coleganan sindical pa nan haci mescos.” Y Josephine Albertus no tabatin problema pa comparti su conocemento cu nan. “Mi a traha hopi bon cu tur 15. Mi por a yama nan. Mi tabatin contacto cu tur. Mi tabata contento cu nan por a duna mi e confianza, pasobra aunke uno no ta papia cu e otro, pero ora mi yama, mi tabata haya oido y informacion.” Y ta e informacion aki Josephine tabata usa pa yuda cu e causa comun di tur.

SIMAR

E siman aki lo sali un anuncio pa habri e votacion pa tur hende cu kier e funcion di Presidente, pa por postula nan mes. Na October e miembronan lo vota pa e Presidente nobo. “Lo mi yuda mi reemplasante sigur. Mi ta spera cu ta un hende cu ta dispuesto pa hinca tur su energia den e funcion y mi lo t’ey pa guia, pa asina cu e por cuminza bon. Mi a documenta mas cu mi tabata por, tin diferente rapport.” Un di e rapportnan ta su conocemento y experiencia cu Caribbean Union of Teachers y ta anticipa cu pa 2023, SIMAR lo ta miembro di e organisacion aki.

En todo caso, Josephine Albertus no ta duda cu SIMAR lo haya un bon Presidente nobo. Si e mira den e team cu a sostene su trabao y a traha hunto cu n’e, e ta convenci cu e ta laga e sindicato den un bon man.