Via proyecto cu ta concentra riba desaroya maneho y programa integral pa hobennan ATHA a crea condicionnan pa por stimula y mehora participacion di hobennan den e area social y e forsa laboral. E vision ta pa ekipa tur hoben pa por haci uso optimal di nan potencial.

E meta di e proyecto ta pa duna reconocimento na hobennan y empodera nan cu cursonan cu lo contribui pa motiva e hoben aki pa sigui progresa, sigui kere den su mes pero alabes e hoben aki lo ta un “role-model” pa otro hobennan.

Un grupo di 20 hoben y nan mayornan a bini huntu na oficina di ATHA na Dakota pa siña conoce mas di e contenido di e projecto Poder di Hubentud 2025. Durante e encuentro aki hobennan a ricibi e programa te cu December unda lo celebra e final di e proyecto aki.

Durante 6 siman e hobennan cu for di July a cera conoci cu otro lo sigui e trayecto di liderazgo y teambuilding, dirigi pa profesionalnan den nos comunidad.

Cada proyecto lo mester tin un meta specifico dirigi na nos hobennan y mester ta uno sostenibel.

Projecto mester tin calidadnan den dje manera, Social, Arte y Cultura, Educacion, Deporte, Trabao boluntario, Innovacion, Comunicacion (Media y tecnologia).

Durante e encuentro hobennan a cera conoci cu e coordinador di e proyecto sra Elsa Krosendijk, cu for di 2014 a inicia e proyecto aki “Poder di Hubentud”. ATHA ta sumamente agradecido pa e aceptacion di sra Krosendijk di t’ey back y pa por comparti su conocemento den e proyecto aki hunto cu Jhon Freddie Montoya di DCA, Directora di ATHA sra Franchesca Heinze y e comision di ehecucion.

Durante un periodo di 2 luna lo ekipa e hobennan cu diferente workshops y lo dirigi nan con pa traha, ehecuta, documenta y presenta nan proyecto.

Un bunita momento tabata ora e prome ganador di Poder di Hubentud sr Aldrich Dijkhoff a duna su testimonio di kico Poder di Hubentud a nifica pe. Segun Dijkhoff ; “Mi a reconoce awo, como un adulto, cu mi evolucion como ser humano hoben pa uno responsabel a cuminsa for di e temporada ey y mi ta mira te cu mi a crece dor di e preparacion aki, prome lugar como coach di muchanan chikito, sinti mi potencial pa bira educador pero no a logra y e la reparami mihor como profesional. Mas cu tur cos pasando den mi evolucion e programa a yuda preparami mas ainda como mayor di mi yiu muhe. Mi kier encurasha boso como hobennan di awendia, pa absorba tur locual ta wordo duna na boso den e cursonan, charlanan, paso esey ta e yabi cu lo habri boso porta di exito den futuro, e lo tin un mihor preparacion pa bo futuro hunto cu bo educacion na scol. Mi semper tey pa duna cualkier conseho of guia.”

Despues di esaki e hobennan a ricibi 10 minuut di tempo pa hunto cu nan mayornan tuma e decision di sigui den e proyecto bunita aki. Bou di hubileo y aplauso a puntra cada un si nan ta sigui di cual 1 a bisa cu pe lo ta dificil e resto (20) a acepta e reto.