Manera ta conoci recientemente Parlamento di Aruba a aproba un mocion presenta pa fraccion MEP cu ta consisti di reduccion di ora y dianan di trabao. Diferente organisacion a reacciona riba esaki y a expresa nan punto di bista riba e tema. Ayera durante un conferencia di prensa Aruba Trade & Industry Association (ATIA) tambe a splica con esaki por afecta e mercado laboral di forma negativo si introduci’e aworaki.

Presidente di ATIA, Sr. Herrick Henriquez, a splica den su declaracion cu e proposicion pa reduci ora y dianan di trabao ta uno cu nan ta mira cu por ser implementa den futuro. El a remarca cu nan ta mira cu aworaki no ta e momento oportuno pa haci’e. “Door cu tin scarsedad bo ta bay crea mas scarsedad. Si bo baha e ora di trabao bo ta bay tin mester di mas hende pa yena e oranan ey,” el a indica.

El a sigui splica cu e proposicion ta indica cu lo implementa esaki pa empleadonan di departamentonan di gobierno prome, locual ta trece dilanti e pregunta cu si tur diabierna tur departamento lo ta cerca, cual ta bay un logistica dificil. “Bo mester bay schedule e hendenan, e ta bay ta un logistica dificil. Tin departamento cu no por esey mes. Departamento di Aduana, polis, inmigracion, bo tin e departamentonan esencial cu no por cera. Aunke bo ta laga e hendenan traha cuater dia nan mester keda habri,” el a enfatisa.

Henriquez a señala cu si bay over den sector priva, turismo, hotelnan ta traha 24 ora pa dia siete dia pa siman, cual ta complica e logistica mas ainda.

El a splica cu tin companianan a cuminsa haci’e y paisnan a adapta na e cambio aki. El a indica cu paisnan unda cu e economia ta satura, cu tin trabao pa tur hende y tin hende ta busca trabao, haci esey pa crea mas cupo di trabao. Pero na Aruba e situacion ta completamente contrario. El a enfatisa cu na Aruba no mester di esey awor, mas bien mester di mas empleado.

“Den futuro ora e mercado stabilisa su mes e lo ta algo cu ta hopi bon pa pensa riba dje pasobra e ta proba cu e ta aumenta productividad,” el a agrega.

Por ultimo Henriquez a splica tambe cu lo mester haci si implementa e reduccion di ora di trabao aki, ta cu lo mester bay cambia e leynan laboral pa tin mas flexibilidad pa esaki. El a indica cu awor e ley ta proteha empleado hopi, pero lo mester yega na un balans unda ley ta bira uno cu ta basa riba desempeño, caminda cu si un empleado no tin un bon desempeño, e ora por tuma medida pa esey tambe.