Diasabra ultimo, 5 juli 2025, Aruba a experiencia un blackout completo pa alrededor di 6 ora. The Aruba Trade and Industry Association (ATIA) a tuma nota di e splicacion di Sr. Koolman director di WEB, pero ta haya cu esaki no ta uno completo y hopi vago.
Un blackout ta costa comercio di Aruba miyones! A comenta riba e institucionnan vital manera, HOH, AAA, y Imsan y ki impacto e blackout tawata tin pa e instancianan aki. Pero e companianan cu a sinti e efecto di e blackout mas, ta e companianan chikito, esunnan cu ta depende specialmente di nan benta ariba un diasabra pa por genera entrada extra den un fin di siman yen di evento. No por a swipe, no por a saca cash, no tur edificio tin delco como un backup, cu a haci cu hopi compania chikito mester a cera nan portanan. Tambe mester menciona cu hopi aparato y mashin electronico na diferente negoshi y cas por daña ora tin blackout asina pa cu e iregularidad den coriente.
Pregunta cu ATIA tin ta kico WEB por haci pa garantisa cu esaki no ta pasa mas? Dicon e motornan a faya? Nos ta biba riba un isla moderno unda cu esaki no mester pasa. Porta a yega ora pa Gobierno di Aruba considera kita limite di panel solar y legalisa uso di bateria manera na hermana isla, asina comerciantenan y ciudadanonan por cuminsa inverti pa nan por tin coriente confiabel 24 ora pa dia. ATIA ta consciente cu esaki por caba, pero bo lo mester ta 100% “off-grid”, pero nos ta di opinion cu e lo mester por si un compania of un persona kier keda riba red di coriente normal tambe.
Nos ta contento a recupera coriente den 5 ora y 45 minuut, pero un disculpa no ta yuda recupera e miyones perdi! Ken para responsable pa esaki financieramente?
