ATIA: ‘Decision den aumento salario minimo no ta mustra transparencia’

Ronald van Trigt, presidente di hunta di ATIA ta un poco asombra cu e manera cu e introduccion di aumento di salario a tuma luga. E organisacion cu ta representa gremio comercial ta enfatisa cu nan no a haya atencion for di gobierno prome cu a tuma e decision aki. Nan no a haya ningun informacion detaya na kico ta e motivacion tras di e decision.

Manera publica den nos edicion di ayera, ministerio di Asuntonan Social, Hubentud y Labor, Departamento di Labor y Investigacion a anuncia cu desde 1 augustus ultimo a ahusta e salario minimo. Esaki a ta conta pa empleadonan cu tin 18 aña of mas den e trabao. E salario minimo a aumenta pa Awg. 1.711,15-, pa luna y Awg. 399,10. Presidente di ATIA ta bisa cu pa haya sa riba 9 di augustus cu entrante 1 di augustus e salario a subi, no ta e manera mas elegante pa introduci un aumento cu lo afecta un parti di comercio. “Como representante di comercio nos ta compronde tin biaha cu gobierno ta desea di tin un maneho, pero hopi biaha e maneho aki ta wordo discuti tambe cu e partnernan cu tin di haber directamente cu esaki,” sr. Van Trigt ta comenta na Bon Dia Aruba.

No ta haya premio di transparencia
ATIA tin un posicion tambe den Sociaal Economische Raad (SER). Den e afkondigingsblad di 21 di juli por wak cu e diferente huntanan a wordo scucha, pero pa ATIA toch e ta bin como sorpresa. “E manera cu el a wordo introduci sigur no lo haya un premio di transparencia cerca nos. Nos ta kere cu nos lo por a haci e den un otro manera y na un otro momento tambe. Nos por a discuti esaki mirando cu gobierno semper ta bisa cu nan ta habri pa dialogo y intercambia idea. Specialmente ora cu tin accionnan cu mester wordo tuma cu tin influencia riba nos economia y comerciantenan, paso na final nan tin cu bay page.”

Den pasado segun ATIA nan ta haya opinion di SER, nan ta wordo informa di opinionnan di Conseho Consultativo y e base na pakico e decision ta wordo haci. Tin biaha e ta bin pa motibo di inflacion, tin biaha e mercado laboral ta exigi esaki. Pues segun e organisacion, tin cierto cosnan specifico economico/fiscal cu ta determina e accion aki. “Anto nos ta sinti den nos caso cu e accionnan cu ta wordo midi pa tuma un decision asina no a wordo comunica suficientemente, sigur no cu gremio comercial. Kiermen nos realmente no ta di acuerdo di e manera cu esaki a bay”, sr. Van Trigt ta bisa.

Consecuencia pa comercio
E presidente ta lamenta cu den corant nan mester a lesa cu e cambio aki a wordo ahusta dia 1 di augustus. Den comercio generalmente un di e cosnan cu nan ta tende tur ora ta cu na Aruba ta hopi caro pa haci negoshi. “Nos sistema di impuesto ta caro, nos primanan social ta caro y comerciante ta esun cu ta carga mayoria di e gastonan aki. Ta algo cu nos ta den contacto constantemente cu gobierno pa trata di haci nos sistema di impuesto por ehempel na un forma mas husto. Y tambe na un forma cu e presion ta wordo kita un poco for di comercio pero tambe for di consumidornan.”

Comercio lo mester bay inverti tempo di personal y ahustacion den programa pa adapta e cambio di salario aki na mita di un aña fiscal. Y paga e cuenta cu ta wordo impone ariba comercio di Aruba segun ATIA. Den e dianan nos dilanti nan lo bay scucha nan miembresia y tur otro gremionan comercial pa fiha un posicion uni.

Reaccion di comunidad
Na otro banda hopi hende den comunidad tambe a reacciona riba e decision aki riba rednan social. Riba nos pagina di Facebook Bon Dia 24 por ehempel, un persona a skirbi cu: “Tur organisacionnan comercial por sapatia pero nos tur sa cu den e mundo di awendia tur cos ta subi. Comerciantenan no ta tene cuenta cu e trahado pero si kier exigi pa nan tene cuenta cu nan.”E ta sigui: “E trahado ta djis un number pa yuda e comerciante gana placa y ademas pa e comerciante ta su ganashi so ta conta. Den bida tur cos ta give and take y nada lo probecha ningun hende pasobra rico of pober ora nos bay di e mundo aki, cu nada nos no ta bay.”

Hopi hende ta comparti e mesun pensamento cu comerciantenan ta esunnan cu ta afecta e poder di compra di hende local y cu mester stop cu e tipo di criticanan aki. Nos a purba di haya un reaccion for di otro gremionan manera AHATA pero no a logra ainda. Nos lo combersa cu algun comerciante tambe pa mira nan punto di bista riba e tema.

You May Also Like

Presupuesto 2018: 12 pro y 8 contra

Presupuesto pa aña 2018 a keda aproba cu un total di 12 voto na ...

Lek diesel hospital a contamina Bubali Plas

Aunke autoridadnan a haci esfuerso pa preveni cu e lek di diesel for di ...

Accion St. Aloysius School: ‘Acumulacion di problema di varios gobierno’

Ayera mainta e docentenan di St. Aloysius School a fada di e situacion deplorabel ...

Segun minister Xiomara Ruiz-Maduro: Banco Central ta bay traha a base di cuenta nacional di CBS

ORANJESTAD – Ayera pais Aruba a conoce su prome cuenta nacional despues di hopi ...

‘Wetlands ta aporta den control di polucion riba un pais’

Segun un articulo publica via Rivers of Carbon (riversofcarbon.org. au), no mester descarta e ...