Ariana Croes ta un hoben cu tin un trayectoria largo den e deporte di rhythmic gymnastics compitiendo den diferente campeonato nacional y internacional y logrando diferente medaya pa Aruba. Mas recien Ariana a participa den e Campeonato Panamericano na unda pa prome biaha Aruba ta clasifica pa e Mundial di Rhytmic Gymnastics y e Weganan Centro Americano y di Caribe.

Den un entrevista cu Bon Dia Aruba Ariana ta conta cu como parti di su preparacion el a bay train pa dos luna na un club di gymnastics na Chile di un coach di seleccion di gymnastics di Chile mes. E coach aki, el a splica, el a conoce durante un curso di coaching cu el a tuma na Aruba y a cera un amistad y asina a dicidi pa e bay train dos luna intensivo na Chile pa e campeonato Panamericano.

Na Chile Ariana a competi tambe den un competencia di clubnan di Chile cu tabatin y el a logra gana medaya den tur cuater rutina cu el a presenta.

Despues di su preparacion na Chile, Ariana a bay representa Aruba den e campeonato Panamericano, na unda tambe pa prome biaha Aruba a participa. Durante e campeonato Ariana a logra clasifica pa e mundial di rhythmic gymnastics cu lo tuma luga na Brasil den augustus y pa Weganan Centro Americano y di Caribe cu lo tuma luga otro aña.

“E competencia a bay hopi bon, mi tabata sinti hopi mas sigur di mi aparatonan pasobra mi a prepara pa hopi largo. El a bay super bon, e tabata algo hopi nobo, nunca mi a yega di competi riba un podium cu e vloer ta manera lanta, cual tabata un tiki scary, pero el a bay hopi bon. Nos a ricibi hopi comentario di e huesnan cu nan ta wak cu mi a mehora hopi y cu nos ta bayendo den bon caminda. Esey tambe tabata hopi great y tabata hopi great pa competi cu e mihonan. Mi a competi hasta cu atletanan olimpico,” el a indica.

Su preparacion na Chile tabata uno intenso y despues di esaki, Ariana a conta, e ta sinti mas sigur di su mes y mas prepara tambe. El a sigui conta cu hopi cosnan cu antes e no tabata hopi bon aden awor e por bisa e ta sinti mas confortabel ta haci nan den su rutina y ta sinti mas sigur. Ademas e ta mira cu su tecnica a mehora hopi tambe. “Mi ta sinti mi ta competi mas limpi y asina mi por sigui aumenta mi puntonan. Mi ta contento cu esey,” el a agrega.

Pa loke ta su preparacion pa e campeonato mundial na Brasil den luna di augustus, el a splica cu awor e ta bay cuminsa cu su trainingnan back y hunto cu su coach nan ta bay cuminsa traha pa drecha algun cos, haci algun cambio chikito pa hiba un rutina di un nivel di calidad halto. El a indica cu ainda nan ta deliberando con e preparacion ta bay ta hinca den otro, pero e meta ta pa haci’e di e miho manera pa e sinti su mes sigur den e competencia.

“E preparacion cu mi a haci na Chile no tabata solamente pa e Panamericano, pero e tabata echt un preparacion completo pa e siguiente competencianan pasobra e tabata hopi intenso y aworaki mester enfoca mas riba cosnan chikito y tambe riba e parti mental den e competencia,” el a remarca.

Por ultimo, pa loke ta su metanan, Ariana ta conta cu si a puntr’e algun aña atras kico ta su meta, e lo a bisa cu e lo haya super great pa djis bay un competencia afo representando Aruba. Awor cu el a yega di bay e campeonato Sur Americano, cual tabata un emocion increibel, y awor cu el competi den e Panamericano e sentimento a keda mescos, y awor cu e ta prepara pa bay e mundial pa representa Aruba pa prome biaha den historia, e ta un sentimento inexplicabel.

“Mi nunca a imagina mi lo bay un mundial, ni tampoco cu mi lo clasifica pa Weganan Centro Americano y di Caribe. Mi por bisa mi siguiente metanan ta pa purba clasifica pa Weganan Panamericano y por ta purba clasifica pa olimpiada, pero mester wak con tur cos ta bay. Semper mi kier sigui apunta mas halto y esey ta echt un soño grandi di mi,” el a enfatisa.