Atletanan a competi den e di 9 Aruba Caribbean Cargo/Arumia Logistics Taekwondo Cup

Diasabra ultimo a tuma luga e ultimo clasificacion pa Best of the Best 2016 na Centro di Bario Brazil y un total di 3 scol di Taekwondo a participa. Tur e atletanan cu clasifica pa Best of the Best lo enfrenta Corsou, Venezuela y Surinam.

Hunto cu e presencia di algun empresario cu a bin pa evalua e campeonato y por bisa cu aki tabata tin un campeonato bon organisa cu 3 referee internacional y cu atletanan di nivel internacional cu a participa na e evento aki. Dr. Guaicaipuro Jimenez presidente di Aruba Taekwondo Bond a bisa un discurso tocante di e evento y a gradici tur esunnan presente pa nan participacion y contribucion na Taekwondo.

Grand Master Chaco Jose Cornelio a splica tur hende di e ultimo cambionan cu tin y alabes a bisa con e atletanan di Aruba a bringa na Costa Rica treciendo medaya di plata y brons pa Aruba. Despues cu Grand Master Chaco Jose Cornelio a controla e particion di pool y a aproba esaki, e evento por a cuminsa. 

Despues di 2’or y mey di atardi e evento a termina y asina e di 9 Aruba Caribbean Cargo/Arumia Logistics Taekwondo Cup 2016 a yega su final. Diahuebs awor durante di reunion, Brazil Taekwondo Stichting lo scoge tur e atletanan cu a clasifica pa participa na Best of the Best 2016.