Dia 31 di augustus Minister Dangui Oduber a anuncia aumento di uitkering di pensioen di biehes den cual a splica cu aña 2020 y aña 2021 tabata e añanan di mas dificil den historia pa pais Aruba.

Pandemia Covid-19 a pone retonan grandi pa Aruba como pais pero hunto den union pais Aruba a surpasa tur. Ora nan a kere cu situacion lo bira miho e guera na Ukraina a cuminsa y esaki a conduci na inflacion rond mundo y factornan externo cu tin hopi influencia riba Aruba.

Como minister encarga cu SVb, naturalmente tin cu pensa riba e grandinan y con pa yuda nan den e presion cu inflacion a trece cune pa nan.

No obstante tur e retonan di aña 2022, minister a indica cu “e aña aki ta uno excepcional pa nos turismo y economia. E recuperacion rapido di nos turismo y economia ta bayendo bon”.

Aruba ta surpasando nivelnan di aña 2019 cual tabata un di e miho añanan pa pais Aruba. Unda economia lo crece cu double digits e aña aki. E prome kwartaal di e aña aki Banco Central a publica cu Aruba su economia a crece cu 16.2%. Primanan ricibi pa e prome 6 lunanan di e aña aki, a conoce un aumento di 12.2%. Tur esaki a conduci cu tin espacio pa ahusta uitkering di pensioen di biehes.

Igualmente minister Oduber a señala cu nan tabata den espera di e cifranan oficial di CBS na e momento ey, pa loke ta inflacion pero a tuma e decision caba pa adapta e pensioen di behes entrante 1 di januari 2023 cu minimo 3%. Segun ley, gobierno por adapta e pensioen cu maximo di e aumento den indice di prijs di consumo midi di 1 di september 2021 pa 31 di augustus 2022.

Proyeccion di SVb ta cu e indice di prijs durante e periodo menciona lo ta entre 4.1 pa 5.4%. Na e momentonan aki por indica cu lo ta responsabel un aumento di minimo di 3%. Si e desaroyo den e fondo mehora mas ainda, lo por aumenta algo mas.

Ayera, medionan local a haya un comunicado unda ta indica cu e cifra di esaki a aumenta na 5% “cu e aumento di 5% aki tur nos pensionadonan cu ta parehanan casa lo haya un aumento di 98 florin pa luna y pa pensionadonan soltero esaki ta un aumento di 58 florin pa luna”, e comunicado ta indica.

Di biaha reaccionnan a bin dilanti riba rednan social unda usuarionan di Facebook e cual nan a indica esaki como un bon noticia y cu esey lo yuda un tiki pa paga un cu otro gasto.

Tempo pasa, na aña 2019 den un conseho di minister riba proposicion di minister Oduber tambe a dicidi di aumenta e pensionnan di behes den e siguiente forma entrante 1 di januari 2020: den e tempo ey e pensioen pa soltero tabata wordo aumenta di 1.132 pa 1.157 florin, pensioen pa pareha tabata aumenta di 1.906 pa 1.948 florin, pensioen dividi pa pareha tabata aumenta di 953 pa 974 florin, e pensionnan pa huerfano y viudo tabata keda adapta cu e mes un porcentahe.