(NLTimes) – Universidad di Amsterdam ta preocupa pa cu e cantidad cu ta aumentando rapidamente di studiantenan internacional yegando e capital Hulandes.
No tin suficiente vivienda pa nan, e cantidad di trabao riba e docentenan ta aumenando y studiantenan Hulandes por ta perdiendo e oportunidad di studia den nan mesun pais, Geert ten Dam, president di e hunta administrativo di University of Amsterdam (UvA) a declara na Het Parool.
Durante e añanan aki, e cantidad di studiantenan Hulandes na UvA a aumenta cu 6 porciento, mientras cu e cantidad di studiantenan internacional a bira tres biaha mas cu loke e tabata, segun e corant. Mas o menos un tercer parti di UvA su 41,000 studiante ta bini for di exterior.
E internacionalisacion aki a cuminsa mas o menos 15 aña pasa ora cu e gobierno y companianan a apela na universidadnan pa atrae mas studiantenan internacional pa asina obtene mas conocimento tocante exterior y prepara studiantenan Hulandes pa un mercado di labor cu ta keda bira mas global. Universidadnan a cumpli cu esaki, sinembargo nan no a premira cu e cantidad di studiantenan internacional lo aumenta asina lihe, Ten Dam a conta. “Mirando back, e tabata un poco irrealistico di nos parti pa pensa asina.”
Segun su persona, e consecuencianan di crecemento rapido aki ta ser mira den henter e universidad. Docentenan no por cumpli cu e gran cantidad di trabao, y e gruponan pa studia-traha ta birando cada biaha mas grandi, causando cu tin cada biaha menos luga unda e studiantenan por bay y studia. E ta dificil pa haya acomodacion na Amsterdam, specialmente pa studiantenan internacional cu no sa con e mercado di vivienda ta funciona.
Pa motibo cu e universidadnan no ta permiti duna studiantenan prioridad basa riba nan nacionalidad, Ten Dam ta preocupa tocante e futuro di e studiantenan Hulandes na University of Amsterdam. Awo nan mester competi cu studiantenan motiva di henter e mundo pa ricibi un luga den e programa. “E no por ta e caso cu hobennan y Hoorn, Nieuw-West of Zuidoost no por studia na UvA mas pa motibo cu nos ta asina atractivo pa studiantenan internacional,” el a declara.
