Corte Comun di Husticia a rechasa e apelacion di ex-minister y actual parlamentario Mike de Meza (AVP) dialuna ultimo. De Meza a pidi hues pa obliga Ministerio Publico (OM) inform’e den detaye tocante e acusacionnan cu tin den su contra y si ta bay persigui e si of no. Sinembargo, Corte a dicta cu un orden asina den e fase aki di e investigacion no ta compatibel cu e sistema huridico y e podernan di Corte.

E caso di De Meza a bira controversial mas tempran e aña aki durante e proceso di su nominacion y screening como minister den e gabinete nobo. Durante e proceso aki, el a ser poni na altura cu e tabata e tema di un investigacion penal andando. E sospecho supuestamente ta relaciona cu articulo 68, inciso 2, di e Algemene Landsverordening Belastingen, cu ta mustra riba posibel violacionnan di belasting.

Riba 11 di juni 2025, abogado di De Meza, Sra. Desiree Croes, a entrega un peticion na Corte di Prome Instancia di Aruba. Den e peticion aki nan a exigi pa Ministerio Publico aclaria mesora e naturalesa y motibo di e sospechonan. Dia 25 di juni Corte a dicta cu Ministerio Publico mester inform’e por escrito dentro di 14 dia si De Meza tabata un sospechoso y, si ta asina, na cual ofensanan e sospecho tabata pertenece. E ora ey Ministerio Publico a confirma cu en berdad De Meza ta un sospechoso den un investigacion andando riba posibel infraccionnan fiscal.

De Meza y su abogadonan a entrega varios peticion similar, cu e exigiendo informacion detaya tocante e naturalesa y causa di e acusacionnan, incluyendo e hechonan specifico cu ta fundamenta e sospechonan, y un decision si ta bay persigui de Meza of no dentro di un periodo cu mester ser determina pa Corte, di moda cu ta cla si e caso lo resulta den un dagvaarding.

Dia 17 di juli Corte a nenga e peticion. Corte a haya cu Ministerio Publico a cumpli caba cu e ordo anterior di dia 25 di juni y cu tabata mucho trempan pa spera un decision di Ministerio Publico prome cu dia 15 di augustus. E intentonan di De Meza pa apela e decision aki inicialmente a fracasa pasobra a surpasa e fecha di apelacion.

Su ekipo di defensa a entrega un peticion practicamente identico atrobe dia 12 di augustus. E peticion aki tambe a keda rechasa dia 15 di augustus, argumentando cu e decisionnan anterior a bira final. De Meza a apela e decision aki na Corte di Apelacion dia 18 di augustus.

E caso a ser trata den door di Corte di Apelacion na Corsou dia 9 di september 2025. De Meza, su abogadonan, y Procurador General tabata presente na Aruba via video link. Corte a scucha ambos partido y a fiha e veredicto pa dia 29 di september.

E defensa a argumenta cu De Meza tin derecho riba informacion mas detaya tocante e acusacionnan, citando articulo 6 di Convenio Europeo di Derechonan Humano (ECHR) y Constitucion di Aruba. Tambe nan a exigi pa Ministerio Publico tuma un decision si ta bay persigui De Meza den un tempo rasonabel pa evita cu e ta keda den incertidumbre pa un periodo prolonga.

Di su banda Ministerio Publico a argumenta cu mester declara e apelacion infunda of no admisibel. Segun Ministerio Publico, e peticion di De Meza tabata prematuro pasobra ainda e investigacion penal ta andando y ainda ningun persecucion a tuma luga. Es mas, Procurador General a argumenta, De Meza no ta candidato minister mas, y por lo tanto no tin un “necesidad urgente” di alivio hudicial.

Corte a atende extensivamente e admisibilidad y substancia di e caso. A determina cu e apelacion di De Meza tabata en berdad admisibel, a pesar di e decisionnan di inadmisibilidad anterior. E hecho cu e por a bira minister atrobe a nifica cu su interes den e caso tabata relevante ainda.

Segun Corte, ni ECHR ni Constitucion di Aruba ta obliga Ministerio Publico pa duna informacion detaya den e fase aki. Tanten cu un persecucion, manera un citacion, detencion preventivo, of un orden di e hues comisario, no tuma luga Ministerio Publico ta solamente obliga pa duna e sospechoso informacion cortico. Esaki a sucede caba na juni ora cu Ministerio Publico a informa De Meza cu e ta un sospechoso y cu e caso ta encera ofensanan fiscal.

Mas aleu Corte a mustra cu Ministerio Publico ta gosa di podernan discrecional, pues hues no por ordena Ministerio Publico pa tuma un decision dentro di un tempo cortico. Solamente si tabatin un tardansa irasonabel of si a surpasa e limite rasonabel stipula den articulonan 55 y 56 di e Codigo di Procedura Penal, hues por a interveni. Esaki no ta e caso awor: e keho a ser entrega dia 23 di mei 2025, y e investigacion tin solamente cuater luna andando.

Aunke Corte a rechasa e peticionnan formalmente, el a expresa comprension pa e posicion di De Meza. A reconoce cu ta den incertidumbre ta causa stress p’e, specialmente mirando e atencion publico y su rol como politico. Sinembargo Corte ta confia cu Ministerio Publico lo tene cuenta cu e circunstancianan special y termina e investigacion dentro di un termino rasonabel, pa asina De Meza no keda den limbo mas largo cu ta necesario.

E sentencia a conclui claramente: Corte ta nenga e peticion. E huesnan a enfatisa cu mas intervencion den e fase di investigacion lo viola e separacion di poder y e principio di expediencia cu ta proteha Ministerio Publico.

E decision tin tanto implicacionnan politico como huridico. Pa De Meza personalmente, esaki ta nifica cu e lo no haya mas claridad pa loke ta trata su posicion huridico por lo pronto. Su status como sospechoso ta keda insigur. Pa Ministerio Publico, e sentencia ta confirma cu e tin discrecion di politica amplio den e fase inicial di un investigacion y no por ser forsa pa tuma decisionnan prematuro.

E caso ta keda uno sensitivo pa politiconan di Aruba. E posibel regreso di De Meza na un puesto di minister ta depende di resultado di e investigacion penal aki. Corte a enfatisa cu su interes den claridad ta genuino, pero na final a pone e limitenan legal di procedemento penal riba mesa.

Cu e sentencia aki, e bataya legal pa De Meza ta keda mesun compleho.. Su peticion pa mas informacion y un decision rapido si ta bay persigui e of no a keda nenga, pero e presion riba Ministerio Publico pa completa e investigacion cuidadosamente y na tempo ta keda. Pa politica di Aruba, esaki ta nifica cu e asunto di De Meza ta tira un sombra riba e formacion di e gabinete y e confiansa di publico den proceduranan di integridad por lo pronto. E proximo lunanan lo determina si Ministerio Publico ta dicidi di persigui, of si finalmente e caso lo ser rechasa.