Manera ta conoci siman pasa Corte Comun di Husticia (Hof) a dicta sentencia den e caso penal contra sospechoso G.F.B., ex-minister Plenipotenciario di Aruba na Hulanda. E caso aki, conoci como Tulipan, ta trata di malversacion di fondonan publico y abuso di funcion durante e periodo di 2017-2022 na Arubahuis.

Segun Ministerio Publico a informa den un comunicado di prensa, abogado di ex-minister Besaril a entama apelacion dia 30 di juni 2025. Sinembargo, Corte a rechasa e apelacion.

E abogado a informa anteriormente dia 27 di juni 2025, mediante un e-mail pa griffie y Ministerio Publico cu e sospechoso kier bay den apelacion. E e-mail aki a wordo ricibi 5:18pm.

E punto di bista di Ministerio Publico durante e tratamento di e apelacion entama ta cu como cu e sentencia a ser dicta dia 13 di juni 2025 contra G.F.B. “op tegenspraak”, e sospechoso mester a apela no mas laat cu 27 di juni 2025. Segun hurisprudencia constante di Corte Supremo, un recurso legal ta considera den termino di apelacion solamente si e ta entrega den ora di trabao di e griffie. Segun website di Corte, e griffie ta cera 4:00pm. Pues griffie tabata cera caba 5:18pm. P’esey e apelacion ta ser considera di ta entama e siguiente dia di trabao. Esey no ta den e termino den cual e apelacion por a ser entama.

Hof a dicta sentencia conforme e punto di bista di Ministerio Publico y a declara e apelacion di G.F.B. no admisibel. Cu esaki e sentencia di 13 di juni 2025 ta ireversible.

Algun dia despues a bira conoci, a traves di medionan di comunicacion local, cu Besaril lo apela su caso den Cassatie. Esaki a trece algun pregunta tocante con e proceso lo cana y con esaki lo funciona mirando cu e caso mes no a ser trata den corte di apelacion, y adicionalemnte OM a declara e sentencia di 13 di juni 2025 ireversible.

Bon Dia Aruba a tuma contacto cu Ann Angela di OM pa puntra si apelacion den Cassatie ta un opcion aunke no a trata e caso den apelacion; ora e sentencia bira definitivo OM por ehecuta esaki mesora, kico ta e plan pa e ex minister plenipotenciario; mirando cu tin tanto ex-minister a bay cera si lo tin algun gesto di cortesia na momento di detencion; y por ultimo si ta considera probable cu Cassatie lo trata e apelacion si e no tin veredicto di apelacion na Aruba.

Pa loke ta e pregunta si apelacion den Cassatie ta un opcion aunke no a trata e caso den apelacion, Sra. Angela a indica cu si ta un opcion pa Besaril pa apela su caso den Cassatie.

Contestando e pregunta ora e sentencia bira definitivo OM por ehecuta esaki mesora, kico ta e plan pa cu ex-minister Besaril, el a splica cu una bes e sentencia bira definitivo e lo ser ehecuta.

Riba e pregunta mirando cu tin tanto ex-minister a bay cera si lo tin algun gesto di cortesia na momento di detencion, Angela a sigura cu ex-minister Besaril lo ser trata igual y mesun bon cu tur otro persona cu ta haya nan mes den situacion asina.

Por ultimo, contestando e pregunta si ta considera cu Cassatie lo trata Besaril su apelacion si e no tin un veredicto di apelacion na Aruba, el a bisa “claro, e ta su derecho.”

Ta un hecho cu Corte Superior no ta trata sentencia di Corte di Prome Instancia, cual ta loke ex minister Besaril tin, di fecha 13 di juni. Mester tin un veredicto unda cu nan a trata e apelacion, cual no a sucede pasobra Besaril su apelacion a ser declara no admisible, pues no tabatin tratamento. Teniendo e puntonan aki na cuenta, no tin sentido pa apela.

E pregunta cu ta keda ta si Cassatie lo trata e caso aunke no tin un sentencia di apelacion. Caminda pa Corte Superior semper ta keda habri y ta derecho di e sospechoso pa bay Cassatie, pues niun hende no por strob’e di entrega e apelacion, aunke tin un posibilidad cu e caso lo por ser rechasa.

E caso

Na juni, Corte den Prome Instancia di Aruba a dicta sentencia den e caso penal Tulipan, den cual ex-minister Besaril y ex-director interino di Arubahuis, Glenn Ling tabata acusa di malversacion di casi 200 mil florin y abuso di nan posicion como ambtenaar. Ambos a keda condena.

Caso penal Tulipan ta regarda iregularidadnan financiero den Arubahuis durante tempo cu Besaril tabata fungi como Minister Plenipotenciario y Glenn Ling como director interino.

Segun corte, di e investigacion a keda proba cu ex-minister Plenipotenciario Besaril a malversa placa door di laga Arubahuis paga pa e gastonan di uso di telefon priva, di vivienda y biahenan priva.

Ademas Besaril a haci uso di e carchi di banco di Arubahuis pa cubri gastonan personal y priva pa haci compras y come na restaurant. Tambe el a contrata un compania pa servicio di PR, cu ta pertenece na un conoci di dje, mientras cu Arubahuis tabatin un departamento di PR caba.

Hues a remarca cu Besaril, cu su actonan, a afecta e integridad di un instancia manera esun di Arubahuis y a enfatisa cu na momento di haci uso di placa di pais Aruba, e placa mester ser usa pa loke e tabata ser destina y no pa algo otro cu no ta relaciona cu su funcion y cu na final dia lo a duna un beneficio personal.

Hues a splica cu Besaril a beneficia personalmente di e uso di fondonan di pais Aruba y Arubahuis. El a remarca cu el a laga Arubahuis paga pa su propio beneficio, pa cosnan priva y a mal usa su funcion y a mancha e integridad di Arubahuis.

Ademas el a subraya cu Besaril no parce di reconoce e seriedad di su actonan y tabata punta dede riba otronan.

Pa loke ta su condena, hues a splica cu a tene cuenta cu e puntonan pa cual el a haya vrijspraak y e hecho cu e no tin antecedente cu husticia, a dun’e un castigo mas abao di locual fiscal a exigi inicialmente.

Hues a condena ex minister Plenipotenciario Besaril cu 20 luna di prison, di cual 10 luna ta condicional y tres aña di prueba, kitando loke el a sinta caba den KIA.

Pa loke ta e caso di expropiacion, hues a indica cu Besaril mester paga mas di 138 mil florin y si no paga esaki, e lo ricibi un castigo di un aña di prison.