AVB ta anuncia cambionan pa temporada di campeonato 2022-2023; Aruba prome den Caribe pa firma acuerdo cu FIFA+

Durante un conferencia di prensa ayera tardi, presidente di Arubaanse Voetbal Bond (AVB), Randolf Lacle a elabora ariba cambionan importante pa e organisacion y pa e mundo di futbol na Aruba.

Lacle a splica cu dia 21 di juli 2022 durante reunion general di AVB varios cambio a wordo aproba den e reglamento di AVB, pa asina por actualisa y modernisa e reglamentonan y cumpli cu tur rekisito conforme exigencianan di FIFA pa e campeonato nobo, 2022/2023, cu oficialmente a cuminsa dia 1 di augustus, segun e mesun reglamentonan di AVB.

Prome punto di cambio cu Lacle a informa riba dje ta e plataforma FIFA Connect. FIFA Connect ta un plataforma digital di FIFA cu t’ey pa dos aspecto. E prome aspecto ta e registracion di hungadornan den un sistema digital, cual ta un exigencia di FIFA, y en realidad ta algo cu lo mester tabata na luga mas cu ocho aña pasa caba. Pero e aña aki ta wordo introduci. Lacle a comenta cu nan ta reuniendo cu e clubnan y preparando nan pa asina tur hungado cu ta miembro di AVB ta registra den e sistema digital aki.

Lacle a menciona tambe cu door di registra ariba FIFA Connect, tur hungado cu ta miembro di AVB ta haya un FIFA ID nummer cu unda cu nan bay, cualkier parti di mundo, nan lo keda cu e FIFA ID number aki y hungadornan cu bay hunga afo of riba nivel profesional, AVB lo por sigui nan progreso di cerca.

Otro aspecto cu ta hopi importante di FIFA Connect ta e parti di campeonato. Lacle a indica cu nan ta bay digitalisa e campeonato unda tur wega lo wordo registra den e sistema digital. E bentaha di esaki, el a splica, ta cu por ehempel e alineacion, cu aworaki ta wordo yena riba papel y practicamente apenas 15 minuut prome cu un wega cuminsa ta conoci, lo ta disponibel hopi mas prome y ta accesibel pa tur.

“Tur hende por tin acceso tambe na tur informacion di e wega, di e ekiponan cu ta bay hunga y esey ta bay facilita tambe e reportahe ora di weganan di campeonato. FIFA Connect ta algo cu ta completamente gratis pa AVB y e ta un programa cu ta traha. Y mi ta contento cu pa temporada 2022/2023 nos por a logra esaki”, Lacle a remarca.

AVB tin como meta pa presenta e campeonato na un manera mas atratctivo y interesante. Na luna di december 2021, Lacle tabatin un reunion cu representantenan di FIFA unda cu el a splica den ki direccion AVB kier bay cu e campeonato y a splica cu nan kier haci e campeonato mas atractivo, mas interesante cu e bista tambe pa genera fondo cu e campeonato.

El a subraya cu hopi biaha e fondonan cu ta wordo genera di e campeonato no ta suficiente pa apoya e miembronan y mester busca manera con pa yega na esey.

AVB tabatin reunion cu Sr. Dave Roberts di FIFA+, un plataforma cu FIFA a introduci e aña aki y Aruba ta e prome pais den Caribe pa firma acuerdo cu FIFA+. Lacle a remarca cu e acuerdo aki ta importante no solamente pasobra e tin beneficio pa AVB, pa nan miembronan y comunidad di futbol, pero e ta hopi importante pasobra ta bay tin control di e derecho di tur data cu ta wordo colecta a base di nan campeonato.

El a agrega cu tur parti financiero cu mester wordo cubri FIFA ta ocupa di esey y e fondonan ta keda disponibel pa AVB y consecuentemente tambe pa e clubnan.

Tambe, Lacle a informa cu pa loke ta trata transmision di wega ariba plataformanan digital manera Facebook y YouTube, esaki nan no lo tuma luga mas. Tur wega lo wordo transmiti di forma virtual, digital, via e FIFA+. Pero el a remarca cu weganan lo sigui ariba e canal di television di Aruba. FIFA+ ta un plataforma cu por wordo descarga gratis ariba telefon, tablet of computer.

E cambio grandi cu Lacle a anuncia ta e cambionan den sistema di campeonato. El a splica cu Aruba conoce un sistema di campeonato ya caba pa sigur 30 aña unda ta hunga dos rond di wega, despues ta hunga play-off y despues ta pasa pa final.

Segun el a indica nan a analisa e campeonato cu a pasa, nan a papia cu varios grupo y varios stakeholder pa wak kico por haci y AVB tabatin tambe un comision encarga pa revisa e campeonato. Den e comision tabatin combersacionnan tambe tocante kico por haci pa bin cu un sistema pa haci e campeonato mas interesante.

El a recorda cu den pasado a purba di cambia e sistema di campeonato, pero dunando informacion na e clubnan ariba varios ocasion y durante algun combersacion cu e clubnan pa busca feedback di e clubnan, nan a conta cu nan sosten y durante e reunion general ultimo, e cambionan aki a keda aproba.

Pa loke ta e cambionan den Division di Honor Oro, cada ekipo den e division aki lo hunga 9 wega total durante e prome rond. Durante e di dos fase di e competencia e seis ekiponan cu mas punto lo pasa pa e rond di play-off di seis. Ora cu tur team a hunga contra otro y cada ekipo a hunga cinco wega total, e cuater ekiponan cu mas punto lo pasa pa e rond di play-off di cuater. Cada ekipo lo hunga un rond contra otro completando un total di seis wega y e ekipo number uno y ekipo number dos lo avansa pa e wega final.

Pa loke ta e ekiponan cu a termina den e posicion shete te cu dies den e Division di Honor Oro, e ekiponan aki lo cualifica pa e Division di Honor Plata. Ekiponan den e Division 1 cu termina di prome te cu di cuater luga, como tambe esunnan den Division 1 cu termina tambe di prome te cu di cuater luga, tambe lo cualifica pa e Division di Honor Plata. E 12 ekiponan aki lo wordo parti den dos grupo, grupo A y grupo B, di seis ekipo. Cada ekipo lo hunga dos rond pa un total di dies wega, den cada grupo.

E dos ekiponan, number uno di grupo A y number uno di Grupo B lo wordo promovi pa Division di Honor Oro pa e siguiente temporada y lo enfrenta otro den e final di Division di Honor Plata. Ekipo na di dos luga di grupo A lo enfrenta ekipo na di tres luga di grupo B y e ganador lo wordo promovi di division. Mescos den caso di e ekipo na di dos tres luga di grupo A contra e ekipo na di dos luga di grupo B.

Di e forma aki, Lacle a subraya, ta mira riba tur nivel lo tin campeonato. “Mi ta kere ta hopi importante pa nos por enfoca ariba e nivel di competencia unda bo ta haya despues di un rond e seis miho ta bay hunga contra otro y asina nos ta bay haya mas wega competitivo”, el a bisa.

“Nos ta bay mira hopi cambio den e campeonato, nos ta mira un nivel di organisacion mas halto y nos ta wak tambe e weganan ta bay ta mas competitivo y nos ta sigur cu ora nos yega na final di e campeonato, nos ta bay tin un final grandi unda nos ta wak atrobe un stadion yen y cu un tremendo futbol”, Lacle a agrega.