Ocho militar, incluyendo e tripulacion di e avion, a fayece den un accidente cu un avion militar AN-26, cu ta propiedad di forza arma di Cuba, na 70 kilometer di La Habana, comunicado di ministerio di forza arma a revela.
E avion a lanta for di aeropuerto di Playa Baracoa, na municipio di Bauta na 30 kilometer di La Habana, y a dal contra “Loma de Pimienta” cu ta situa na municipio Candelaria, na provincia di Artemisa, na 70 kilometer na oeste di e capital Cubano.
Datonan cu a sali na luz publico ta bisa cu e causa di accidente ta un fayo di motor, asina un oficial di polis a confirma, cu tabata cuida e zona unda e accidente a tuma lugar. E lugar di accidente ta un zona di dificil acceso na Sierra de Rosario, cu awor ta cuida pa polis y unda no tin acceso pasobra eynan ekipo di criminalistica ta den proceso di investigacion. Segun comunicado oficial, un comision di ministerio di Forza Arma ta investiga e causa di e accidente.
Informacion oficial a duna claridad tocante e accidente, pasobra e prome version tocante e accidente aki tabata bisa cu den e accidente a muri 39 pasahero den un avion di uso comercial di aerolinea Aerogaviota, cu ta controla pa forza arma Cubano. E aerolinea aki ta opera cu vuelo nacional na Cuba y otro destino cercano manera den Caribe.
E avion AN-26, di fabricacion Ruso, ta un aeronave cu Cuba ta duna un uso militar y un uso den vuelo comercial nacional di e empresa Aerogaviota. E aerolinea ta di e grupo Gaviota, cu tin varios empresa di sector di turismo y cu ta controla pa efectivo militar di Forza Arma Revolucionario.
Na november di 2010 un aeronave a dal contra un cero na provincia di Sancti Spiritus, situa na 400 kilometer na sur di La Habana. E avion tabata propiedad di e empresa Cubano Aerocaribbean. E accidente a laga 68 hende morto, entre nan 28 stranhero di 10 diferente nacionalidad.
