Ayera mediante un comunicado di prensa, Aruba Airport Authority a informa cu vuelo 870 di American Airlines actualmente ta bayendo back na Aeropuerto Internacional Reina Beatrix despues di su despegue, como un precaucion. Segun e comunicado, e avion tabata haci “fuel dumping” prome cu aterisahe, cu ta un procedura standard di seguridad.
E aeropuerto a activa un Standby Local, cu ta nifica cu servicionan di emergencia ta den alerta como precaucion. Esaki no ta considera como un emergencia, y e aeropuerto a keda habri y operacional.
Informacion no confirma cu a yega Redaccion di Bon Dia Aruba ta indica cu e avion lo a haya problema cu su landing gear, esta su aparato pa aterisahe.
Algun ora despues, AAA a duna un update indicando cu e ora spera pa yegada di e avion tabata 4:12pm, y cu a activa un Emergencia Completo.
“Un emergencia completo ta nifica cu tur unidad di respuesta di emergencia di aeropuerto (bombero y rescate, medico, operacion y agencianan di sosten) ta mobilisa y posiciona completamente den preparacion pa aterisahe di e avion como un medida di seguridad di precaucion,” AAA a bisa den un declaracion.
Pa 4:43pm, AAA a informa cu e vuelo 870 di American Airlines a logra aterisa di manera safe na Aeropuerto Internacional Reina Beatrix, y a gradici tur team involucra pa nan coordinacion rapido.
