Home Local Awa di lama ta bon pa cura malesa di impetigo frecuente den...

Awa di lama ta bon pa cura malesa di impetigo frecuente den muchanan di scol

2841

E bestia microscopico bed bugs of mitj of ‘acaro’ ta den tur caminda. No tin excepcion, e porta den hotel of residencia senciyo of den hotel luhoso di cinco strea. Te hasta bo por trece nan den bo maleta, ora cu bo ta bay di vakantie. Tin biaha cu bo ta wak nan.

Dermatologo, dr. Nuris Lampe a bisa cu e bed bugs aki ta produci herida den bo curpa cu ta ocasiona hopi grawatashi intenso y fastioso. E ta pica bo manera un sangura, y mayoria di biaha bo ta wak e pica di bed bugs riba bo lomba. Bo por diferencia nan, ya cu e pica di sangura bo ta haya nan den brasa, pia y cara. El a describi esaki manera un sarna.

Nan pica ta casi mesun cos, ya cu bo por haya nan den hotelnan y tambe den casnan di famia. Ta importante pa trata di evita tur e tipo di infeccion cu e bestianan aki ta produci. Ta importante pa bin cu medida mas higienico posibel.

Temporada di zomer
Den temporada di zomer tin malesa di solo cu ta masha comun. Nos mester corda cu cancer di cuero segun estadistica ta hopi halto na Aruba. E ta recomenda cu durante e temporada di vakantie aki mester ta preventivo pa evita e kemadura di solo. Cancer di cuero no ta wordo manifesta mesora, sino cu tempo, e ta manifesta su mes.

Hende grandi cu por haya posibilidad di cancer di cuero, nan cuero ta daña caba. E ta algo visibel. Logicamente nan por evita nan mas ainda, esaki pa medio di medida preventivo di abstene di haya rayo di solo den oranan pisa pa ehempel di merdia. Tin cuido segun e specialista aki pero unabes cu e daño ta haci, cu ta uno acumula di hopi aña, bo tin cu preveni hopi mas.

Den e caso di bed bugs e ta recomenda pa trata di cambia e clechi regularmente of revisa bo cama. E bed bugs e ta chikito, pero bo por wak nan, e di. Ta bon pa uza sun block, evita e oranan cu e solo ta hopi fuerte. Mester tene cuenta cu e muchanan nan cuero ta mucho mas vulnerabel y mester protege nan bon pa evita e kemaduranan di solo.

Dr. Lampe a bisa cu e solo ta algo cu semper mester tene cuenta y cuidao cu ne. Ya cu e solo ta algo cu tin su consecuencia riba e cuero y muy specialmente riba e muchanan. No solamente cancer di cuero, sino pa ehempel mancha den cuero, y malesanan di cuero cu bo tin caba, e por haci nan pio.

Impetigo y moluscum contagioso
Un mayoria di malesa di cuero ta wordo transmiti di hende pa hende. Tin dos bateria contagioso den mucha chikito cu ta wordo mira hopi, durante temporada di scol, impetigo y moluscum contagioso.

Impetigo ta hopi contagioso pa e pashent mes, y no tanto cu e ta pega otro mucha. “E ta esun cu ta afecta su mes, ya cu e bateria ta riba su mesun cuero. E ta e vulnetabel”, e di. Mas mucha ta hay’e pasobra nan cuero ta mas delicado of vulnerabel. Di otro banda, e bacteria ta aloca su mes den e parti cu bo ta huña. E cuero ta seco ora cu e ta huña y e ta cuminsa haya e impetigo.

E mucha ta cura, pero e ta haya bek e impetigo. E bacteria ta keda den e parti di nanishi, horea, etc.. Ta importante pa laba e parti unda e bacteria ta hinca su mes. E ta recomenda su pashentnan pa bay lama caminda awa salo ta bay den nanishi, horea y bou huña, y e ta laba e partinan di e bacteria aki.

Moluscum contagioso y impetigo tin casi e mesun manera di comporta su mes. E unico cos ta cu impetigo ta cura mas lihe cu e moluscum, ya cu e por tarda un aña pa e bay. E moluscum contagioso ta aparece chikito, y e no ta molestia. Tampoco e no ta grawata, pero e ta memey di e muchanan tambe. E ta mescos cu cualkier virus.

E ta haya cu moluscum contagioso ta algo cu bo no mester worry cu ne, ya cu e mucha no ta wordo afecta sistemicamente pa e malesa aki.

Dermatitis atopico
Tocante e cuadra alergico cu hopi mucha ta sufri di dje. Dr. Nuris no ta haya cu esaki ta algo alergico, sino cu e ta loke nan ta yama contextura of condicion di cuero. E ta un tipo di dermatitis atopico.

E mucha ta nace cu un cuero vulnerabel. Ta depende con bo ta maneha e tipo di cuero aki, e por bira alergico of no. Mayoria di e problema aki tin un factor genetico. E mucha ta nace cu e vulnerabilidad aki di crea e resistencia of inmunidad contra cualkier cos.

E ta wordo manifesta su mes mayoria di biaha ora cu e mama ta stop di duna pecho na e baby. E ora ey e baby tin cu haya lechi di baca of di formula, nan ta cuminsa haya e problema di cuero di dermatitis atopico. E baby su curpa no tin un adaptacion na e lechi cu no ta di e mama.

E ta splica e mamanan cu pa e dermatitis atopico no tin un cura, pero si un prevencion. E cuero ey mester wordo protegi cu hopi vet y crema. Ta importante pa evita di come cumindanan cu ta sintetico y cosnan cu por crea mas reaccion. E ta manera un hiper reaccion y mester evita nan.