Diabierna ultimo Gobernador di Aruba, Alfonso Boekhoudt a apunta e abogado, Arie Swaen como informador den e proceso di formacion pa un gobierno nobo.

E decision aki a cay despues cu Gobernador a cera un ciclo di reunion di consulta cu e lidernan di e partidonan cu a participa den eleccion ultimo y tambe cu e representantenan di e gremionan y instancianan.

E tarea di e informador ta esun di reuni cu e partidonan politico cu tin representacion di e parlamento nobo cu a keda eligi pa mira den cual direccion mester bay pa loke ta e formacion di e gobierno nobo. E combersacionnan lo cuminsa dialuna proximo y e expectativa ta grandi ya cu ta wordo papia no oficialmente di un eventual coalicion MEP/POR. Tin fuerte indicacion cu no mester descarta otro forma di formacion di un gobierno nobo.

Parlamento nobo

Ta conoci oficialmente kende pa ley ta e 21 miembronan eligi pa forma parti di parlamento nobo di Aruba. E parlamento nobo aki mester sinta dia 27 di october binidero. No ta descarta cu lo tin cambio den e lista oficial aki ya cu posiblemente algun di e politiconan aki lo bira minister y tambe si tuma cuenta di e declaracion di partido MEP cu nan candidatonan ta drenta a base di cantidad di voto, tin persona cu lo mester entrega e stoel aunke pa ley esaki no ta necesario.

Den caso cu durante e fase nobo cu e Informado ta cuminsa e siman aki no por logra e boluntad of compromiso di e partidonan yama pa forma un gobierno nobo, e parlamento lo tin cu dicidi si e gobierno actual ta keda demisionario, te ora cu un gobierno ta wordo forma. Tambe nan mayoria por dicidi di apunta otro persona pa temporalmente goberna e pais, mientras cu nan ta sigui e proceso di formacion. Esaki ta den caso hipotetico cu e proceso di formacion di e gobierno nobo no keda cla prome cu 27 di october.

Rol di AVP den oposicion

Sinembargo esaki ta un posibilidad remoto, mirando e declaracion di e diferente partidonan cu eventualmente lo por forma e proximo gobierno di coalicion. Pero tambe e declaracion di e mesun minister president demisionario Mike Eman, cu a declara te hasta cu no lo forma parti di e fraccion di AVP den oposicion, den cuadro di e formacion di un gobierno nobo.

“No! Mi no lo ta den parlamento di Aruba”, el a declara na prensa despues di su reunion di consulta cerca Gobernador di Aruba.

Sr. Eman a laga sa cu e no ta kere cu despues cu e tabata 8 aña den e funcion di minister president y cu e kier cuminsa den un rol nobo pa su partido y pa e pais, tin cu bay parlamento. E no ta kere cu e mester forma parti di e plataforma ‘hopi polarisa cu parlamento ta’.

E ta kere cu si bo kier duna contenido na un trayecto caminda un ex minister president di un pais por keda contribui di e forma cu e kier hacie, bo no por keda parti di e debate politico cu ta hopi rondona den nos sala di Parlamento.

Encuanto si esaki ta e miho momento den e constelacion actual den parlamento, caminda AVP tin e mesun igualdad di asiento cu MEP, cada un cu 9 asiento, e ta haya cu esaki ta algo cu nan a evalua a base di resultado di eleccion. Tambe nan a evalua e decision di bay den oposicion a base di ‘e cartanan manera ta poni ariba mesa den e momento aki’.