Awe mainta, corte ta bay atende e caso di Chania Fernandes Pedra, kende ta acusa den e caso di un hit and run cu a cobra bida di dos persona y a laga un impacto fuerte den comunidad di Aruba.
Fernandes-Pedra ta e chauffeur acusado den e accidente di hit and run cu a tuma lugar dia 4 di januari 2026, den cual dos peaton, Josely Paulina Vasquez Gonzalez y Carlos David Vialez Valerio, a perde nan bida. E caso a genera hopi conmocion den comunidad y ta entre e procesonan penal cu a ricibi mas atencion publico durante e aña aki.
Ultimo audiencia den e caso a tuma lugar comienso di luna pasa, pero hues no por a trata e caso den contenido pasobra e acusado a presenta den corte sin representacion legal. Esaki a impedi cu tratamento integral di e caso por a sigui manera originalmente tabata plania. Sinembargo, toch e dia ey OM a presenta oficialmente e acusacionnan cu Fernandes-Pedra lo enfrenta ora tratamento di contenido di e caso cuminsa. Segun fiscal di OM, e acusado ta enfrenta cinco acusacion principal relaciona cu e evento di 4 di januari. E acusacion mas serio ta homicidio. Ademas, despues di revisa e documentacion, hues a conclui cu ainda tin varios punto cu mester aclaracion adicional prome cu tratamento integral di e caso por sigui.
Un di e investigacionnan cu ainda ta pendiente ta relaciona cu e sistema electronico (hard drive) di e vehiculo cu e acusado tabata core e dia di e accidente. Corte a confirma cu tin contacto cu autoridadnan na Hulanda pa determina si ta tecnicamente posible pa recupera dato for di e hard drive di e auto.
Awo, segun e programacion di corte, Fernandes Pedra a sigura su representacion legal, y e regiezitting lo duna mas informacion tocante con leu e otro aspectonan di e investigacion ta. Keda pendiente di nos cobertura riba rednan social durante dia pa mas informacion, y den e siguiente edicion di Bon Dia Aruba.
