hebbe (1).jpg

Michel Ruiz, representante di Cerbes Chill, a uni cu organisadonan di Hebbe Hebbe pa anuncia e line-up di artistanan pa e festival gratis cu ta tuma luga diahuebs dia 28 di januari. Como cu tradicionalmente e line-up ta consisti di e artistanan cu a gana Caiso y Soca Monarch y teniendo cuenta cu a cancela e festival di e aña aki, a scoge pa un combinacion di banda y artistanan cu hitnan grandi y legendario cu ta “crowd pleasers” tradicional pa hopi aña.  

Manuel Da Silva y Carl Michael Bikker a haci e anuncionan pa loke ta trata e evento di Hebbe Hebbe. E prome artista, Rusty cu su banda For Real, lo subi stage y cuminsa toca pa exactamente 7:57 di anochi. E artista ta conoci pa su legendario hitnan “Rusty Pot”, “Teolinda”, “Tighter” y “Barricade”. Siguientemente, e stage ta di e finalista di Caiso 2015, esta Buddy, cu a lansa un “atoombom” na radionan hunto cu N’Fusion pa Carnaval 62. Rey di Tumba, Jerrino “Bass” Ridderstap lo presenta cu su banda, sigui pa BMW cu nan hitnan cu a bira “clasico” y ta wordo toca henter aña: “Do the Wiper”, “Cry Cry Baby” y “Bacardi Limon Coca-Cola”.

Cerando e anochi di Hebbe Hebbe 2016, organisadonan ta presenta e banda cu a gana premionan na Aruba, Corsou y Hulanda, cu tur nan hitnan di momento, incluyendo e cantica nr. 1 di aña 2016: Buleria. Special pa e ocasion aki, Buleria lo presenta diferente artista invita pa cera e anochi cu “broche de oro”.

Dedicacion special

Hebbe Hebbe 2016 ta dedica na Maria Lydia “Mani” Lopez, cu lo ricibi un bunita reconocimento durante di e evento. Hebbe Hebbe y Cerbes Chill ta sigui partnernan fuerte pa e evento aki cu a cuminsa 18 aña pasa chikito, riba e plenchi dilanti di Manuelito’s Sports Bar y a crece y bira un di e eventonan hopi gusta y bon atendi durante di e temporada di Carnaval.

Sr. Ruiz a anuncia cu Cerbes Chill lo wordo bendi na un bon prijs y e prome 50 cahanan cu wordo bendi ta bin compaña pa un regalo. E bar y cushina lo ta bon surti y hopi varia cu prijsnan special riba tur e bebida y refresconan di pueblo di Aruba, esta Cerbes Chill, Dewar’s, Bacardi, un seleccion di biña, productonan Coca-Cola y refresconan Tropical. Ademas, Cerbes Chill lo tin diferente sorpresa pa publico durante di henter e evento.