Prome Minister, Evelyn Wever-Croes a confirma cu awe ta tuma e prome Conseho di Minister na San Nicolas, manera Bon Dia Aruba a publica ayera.
El a bisa cu e reunion aki ta uno special den cual nan ta invita e diferente partner, ya cu e ta manera un siguimento di e cumbre di luna pasa cu San Nicolas Business Association a bin cune. Den e Conseho di Minister di awe nan a invita algun di e personanan cu a presenta nan proyecto. Logicamente nan no por a invita tur pa motibo di e tempo cortico. Aunke esaki ta e prome Conseho di Minister na San Nicolas, nan tin pensa di bin cu otro despues.
E intencion di nan presencia den seno di Conseho di Minister no tin di haci cu un presentacion di nan proyecto, sino mas bien kico e inversionistanan kier pa gobierno por haci pa nan por bira realidad nan proyectonan cu nan tin. “Nos kier tene di nan unda gobierno por yuda pa realisa e proyectonan,” el a bisa na Bon Dia Aruba.
Prome Minister Wever-Croes a bisa cu e proyectonan cu nan por mira durante e cumbre, nan tabata proyectonan hopi interesante. Algun ta proyectonan cu nan por weita cu por tuma hopi mas tempo y otronan cu por wordo implementa relativamente lihe.
El a declara cu si a lo menos un, dos of tres proyecto lo wordo realisa na termino corto, e ta cambia full escenario economico riba nos pais y tambe e enfasis aki ta wordo poni pariba di brug na San Nicolas. Gobierno lo tene informa comunidad di e resultado di e reunion aki.
