Presidente di SIMAR, Josephine Albertus a bisa cu awe tur hende di e veld di enseñansa ta bay marca hunto pa 3’or atardi for di ex edificio di DOW te Bestuurskantoor y despues pa Parlamento. Nan lo bay entrega un carta, caminda nan ta vocifera e disgusto cu tin riba tereno di enseñansa.

El a bisa cu e manifiesto cu nan lo entrega awe tardi no tin un punto central. Pasobra si nos ta wak con cos ta bayendo actualmente, ta casi tur cos no ta cana manera cu mester.

Albertus a indica si cu riba e punto di 5% cu nan tin cu entrega, e por bisa cu tur sindicato hunto ta para riba un linea pa esey. Pero si nan wak riba e parti di enseñansa tin tanto cambio constante cu nan tin cu bisa cu si nan ta sigui asina aki, kico ta keda pa enseñansa.

Otro sindicatonan, manera SEPPA y Sindicato di Polis Aruba (SPA), tabatin reunion producto di e disgustonan cu ta existi entre nan miembronan. El a bisa cu ta existi un malcontento di e decisionnan cu ta wordo tuma unilateralmente, sin consulta y sin dialoga cu otro na mesa. Albertus a declara cu SIMAR ta contento cu nan coleganan di SPA y SEPPA a dicidi di cera cabes cu nan. “Pasobra nos tur sa cu den union tin forsa,” el a bisa.

Durante un conferencia di prensa ayera tardi hunto cu e dirigente sindical di SEPPA, Raymundo Marlin, presidente di SIMAR a haci un yamado pa tur esnan cu ta traha den enseñansa, miembro y no miembro, studiantenan di IPA, mayornan y tur otro cu ta sinti nan mes preocupa riba e ultimo desaroyo den enseñansa y tambe otro desaroyonan cu ta pasando den sector publico.

Malcontento.
E ta haya cu loke nan ta bibando ta e comienso. Pero nan no sa kico ta bay spera nan aki dos of cuater luna. Pues presidente di SIMAR ta kere cu si nan ta laga cu gobierno ta sigui manera cu ta bayendo aworaki unilateral pa nan dicidi y deshaci, ‘despues di esaki nada ta keda mas… Y nos ta bisa cu esey no ta husto!”

Presidente di SIMAR a laga sa cu den e reunion cu a sostene dialuna ultimo a wordo confirma cu tur hende den e veld di enseñansa a expresa cu “nan ta cansa di loke ta pasando y nan ta hay’e cu ta basta.” Ademas nan ta haya cu e momento a yega caminda nan mester mustra cu loke ta pasando no por sigui.

Nan ta mira cu for di momento cu Aruba a conoce e crisis di coronavirus/Covid-19, gobierno a tuma diferente decision y SIMAR ta haya cu casi tur a wordo tuma di un manera unilateral. “No tabatin dialogo. No tabatin consulta. Tabatin solamente sinta pa informa,” el a bisa.

Otro punto cu a wordo vocifera den e reunion cu nan a sostene cu tur hende cu ta traha den enseñansa ta e falta di claridad. “Cos ta wordo bisa. Despues cos ta cambia. Bo ta puntra algo y nan no por bisa bo,” segun Albertus. Nan a yega di manda carta pidiendo clarificacion riba cierto punto y te ainda nan no a haya contesta.

Albertus a indica cu, dialuna den e reunion nan cu nan a sostene, nan por a saca afo cu tur hende den veld di enseñansa cu tabata presente a dicidi di scala nan posicion, y bin cu otro manera pa expresa nan malcontento. No di e manera tradicional cu gobierno pidi di manda un carta. E biaha aki nan a dicidi di marcha hunto. Albertus a reitera cu nan kier mustra gobierno cu e disgusto aki no ta algo cu sindicato so ta bisa, pero tur e grupo cu ta canando nan tras, tambe ta vocifera esey.

1 COMMENT

  1. Imaginabo: mas studiante a gradua despues di studia na cas: kiko esey ta pa e maestronan di scol, un luz cu mester tene na cuenta: porta ta combini Aruba duna educashon na cas, y examen na scol, por tin necesidad di menos maestro? Welga???????????????

LEAVE A REPLY

Please enter your comment!
Please enter your name here