Awe den Entertainment Center ta bay tuma luga e competencia di baile cultural di Weganan Escolar Aruba 2023. Jhon Freddy Montoya di Departamento di Cultura ken ta lidera e proyecto aki ta conta con e preparacionnan ta bayendo.
“E preparacion ta bayendo bon. E ta un clausura cultural di weganan escolar. Ta bay tin naturalmente un competencia di baile deportivo cultural,” Montoya a bisa.
Pa e competencia aki tin diferente categoria. E prome categoria ta esun di scolnan special, preparatorio y basico cu ta enfoca ariba e presentacion dedica solamente na bailenan di folklore.
E siguiente categoria ta e competencia di baile di scol avansa na unda e hobennan tin oportunidad di participa cu baile moderno pero cu un toke di folklore.
“Mester inculca na e hobennan e parti di folklore y nos tradicion cu tambe ta importante. Esaki ta motiva pa nos por tin un berdadero generacion di hoben cu ta cultiva e simia di nos tradicion y folklore,” Montoya a expresa.
Tur esaki ta realisa bao di capa di Ministerio di Deporte hunto cu IBISA, y naturalmente Departamento di Cultura, bao capa di Ministerio di Cultura,ta lidera e proyecto di competencia di baile cultural.
Por ultimo Montoya a invita henter pueblo di Aruba pa asisti y apoya e mucha- y hobennan cu ta bay rindi homenahe na cultura di Aruba cu nan presentacionnan. E competencia di baile cultural ta tuma luga den Aruba Entertainment Center y ta cuminsa pa 5or di atardi.
