Manera ta conoci siman pasa diaranson a tuma luga tratamento di e caso cu candidato pa minister Mike de Meza a entama contra Departamento di Impuesto relaciona cu e proceso di screening pa su nombramento como minister.
Durante e tratamento, ekipo di De Meza a remarca cu ta importante pa yega na un resolucion den e caso aki, no solamente pa De Meza por bira minister, pero tambe pa por termina cu loke nan ta considera e difamacion cu De Meza mester a enfrenta durante e tempo aki di parti di politiconan di oposicion riba rednan social y den algun medio di comunicacion.
Di su banda directora di DIMP a indica cu e departamento a sigui e procedura manera debe ser y cu no tin ningun discriminacion contra De Meza pa ken e ta. Simplemente ta sigui e procedura basa riba e rason cu ta pidi e declaracion di fiscaal gedrag, cual den e caso specifico aki ta un procedura di investigacion riguroso.
Hues a haci varios pregunta, adicional na esnan cu el a manda por escrito na cada partido prome cu e tratamento di e caso a tuma luga. Hues a tuma un siman pa repasa e caso y e argumentonan cu cada partido a presenta y lo dicta su veredicto awe 4or di atardi.
