Manera ta conoci e trayecto di proceso di screening di candidato pa minister Mike de Meza a ser alarga pa motibo di diferente contratiempo cu a pone un impasse den e nominacion di De Meza, cual ainda e candidato pa minister y su ekipo legal ta luchando pa resolve. Awe de Meza hunto cu su ekipo legal, lidera pa abogado Desiree Croes, lo ta den corte un biaha mas pa tratamento di apelacion contra Minister Publico (OM).

Dia 17 di juli ultimo hues a entrega su decision relaciona cu peticionnan cu de Meza a entrega na Corte den Prome Instancia E peticion di e ex-minister, ken actualmente ta den nominacion pa bira minister den e gabinete nobo di AVP-FUTURO, ta pidi pa clarificacion tocante e tipo y e motibo di e acusacionnan cu Ministerio Publico (OM) tin contra dje. Ademas, de Meza a pidi OM pa tuma un decision si ta persiguie of no prome cu 15 di augustus 2025.

Den su decision hues a splica cu OM a cumpli cu e decision di Corte di 25 di juni 2025, door di informa Mike de Meza riba e mesun dia ey cu e ta sospechoso den un investigacion cu tin andando y a pon’e na haltura di e articulo den ley riba cual e sospecho contra dje ta basa. Tambe hues a rechasa e peticion pa OM duna contesta prome cu 15 di augustus tocante un posible persecucion. Segun hues, e peticion aki ta di considera prematuro.

E trayecto largo a cuminsa durante e proceso di screening inicial di candidatonan pa minister na momento cu Departamento di Impuesto a indica den luna di april cu De Meza tabatin problemanan pendiente cu impuesto vincula na un compania di cual antes de Meza tabata propietario, cu, maske inactivo pa añas, ta parce di a laga asunto sin resolve.

De Meza a pidi hues pa entrega un orden hudicial na director di DIMP pa saca un declaracion faborable tocante su comportamento fiscal. Manera a reporta e tempo ey, Hof a yega na e conclusion cu e no tin e competencia pa haci un decision tocante e apelacion cu a ser presenta. Esaki ta pasobra dilanti di Hof segun e Lar, apelacion por solamente ser presenta contra decisionnan den e sentido di e Landsverordening administratieve rechtspraak (Lar).

Segun Hof e cartanan di e director di DIMP contra cual de Meza a presenta e recurso y apelacion, no ta decisionnan cu por ser apela. Eseynan ta cartanan di caracter factual y informativo, y no ta dirigi na ningun efecto legal, ni tampoco ta dirigi na e efecto legal si de Meza por of no por bira minister.

Luna pasa a bira conoci cu DIMP a entrega un caso penal contra de Meza, tocante cual OM inicialmente no a duna clarificacion na Sr. de Meza. Pa e motibo aki, de Meza a entrega peticion na corte contra OM. Segun de Meza, den su mesun declaracion, el a tende di formador cu OM a mark’e como sospechoso den e caso entrega pa DIMP. El a pidi hues pa duna ordo na e instancia pa clarifica e tipo y motibo di e sospecho contra dje. Den un decision emiti dia 25 di juni, hues a afirma su opinion cu ciudadanonan cu ta marca como sospechoso tin derecho pa sa pakico nan ta sospechoso y ki tipo di investigacion ta tumando luga contra nan. Sinembargo, esaki ta solamente si e persona envolvi ser oficialmente deteni, interoga of invita pa interogacion. Den e caso di de Meza, esaki no a sucede. Hues a splica e tempo ey cu OM no a emiti un declaracion oficial den cual a marca de Meza como sospechoso, pues nan no ta obliga ainda di duna e tipo y motibo di e sospecho contra dje.

Na otro banda, hues a reconoce e naturalesa precario di e caso aki, unda por papia di circunstancianan excepcional y peso—ya cu de Meza ta nomina como minister—cual lo por exigi pa acelera e clarificacion. Pues hues a dicidi cu OM tin dos siman tempo pa duna un clarificacion na de Meza si e ta sospechoso den un investigacion y e articulo den ley pa cual e ta sospechoso.

E decision aki no tabata satisfactorio pa e nominado di partido AVP, pa cual motibo el a entrega otro caso den cual el a pidi hues pa obliga OM calrifica e tipo y motibo di acusacionnan contra dje, cual hues a rechasa.

Relaciona cu e tratamento di apelacion, segun un portal di noticia local, abogado di de Meza, Desiree Croes a indica cu tin dos punto den e caso di apelacion. Primeramente nan ta pidi pa OM informa exactamente kico ta e acusacion(nan) cu tin contra de Meza, y no simplemente e articulo den ley pa cual e ta sospechoso. E otro punto den e caso di apelacion ta cu de Meza y su ekipo ta pidi pa duna un fecha pa dicidi si tin suficiente prueba pa persiguie.

E hues cu a rechasa e peticionnan mas recien di de Meza ta mesun hues cu a tuma decision prome biaha, pues segun abogado Croes ta logico cu e hues lo no a cambia su decision.

Den e tratamento di caso di apelacion tin tres diferente hues cu lo evalua si e decision di e hues den prome instancia tabata corecto.

E meta principal di e casonan cu de Meza ta trece dilanti pa ta trece un resolucion definitivo den e henter e situacion alrededor di su nominacion pa minister pa e por huramenta como e si siete minister di Gabinete AVP-FUTURO. Mientras tanto gobierno a nombra Sr. Gervais “Baba” Rene Herdé como minister temporal cu lo tuma cartera di Infrastructura, Energia y Telecomunicacion—originalmente reserva pa de Meza. Prome cu e nombramento di Herdé, dr. mr. Arthur Dowers tabata encarga cu e carteranan aki.

E tratamento di caso di apelacion di de Meza ta tuma luga pa 2or di atardi tras di porta cera.