‘Awendia mi ta mira un sociedad cu un mente hopi mas habri’

Jerley Fernandez ta un hoben Arubiano cu actualmente ta laborando den sector financiero. Den e entrevista aki e ta comparti cu Bon Dia Aruba un tiki di su bida cotidiano, su vision y su pensamentonan pa cu e isla. Segun e hoben, awendia tin hopi mas oportunidad.

E hoben Arubiano, cu ta mayor di seis ruman ta conta cu el a crece mayormente cu su mama y su difunto wela mirando cu su tata tabata studia afo. Mas despues, su tata a cuminsa hunga un rol mas fuerte den su bida. E hoben ta subraya “Bendeci cu mi mama y mi tata cu a siña mi hopi di con cosnan ta traha y mayormente di bida. Mi no ta kere nan niun di dos sa cu mientras mi tabata mustra di no ta presta atencion, mi semper a sinta observa y a siña di nan. Mi tabata mira cosnan bon y malo sin mester tende of compronde di kico ta bon y malo di nan banda. Sin lubida di menciona mi otro motivacionnan den e bida aki cu ta mi seis rumannan mirando cu mi ta e ruman di mas mayor mi ta mira y mi ta sinti responsabel pa mustra nan e caminda nan corecto aunke mi no ta perfecto. Mi kier ta ehemplar pa nan”

Crisis presente

E hoben ta comenta cu e ta straño pa pensa cu e tin 20 aña so y ya caba el a experencia asina tanto cos den bida. Mientras cu e ta keda soña den grandi, ainda tin ora su edad ta limite.

E hoben ta conta Bon Dia Aruba “Mi ta labora legalmente caba desde 2016 ora mi a caba middelbare onderwijs, inicialmente na un instituto financiero na unda mi a siña hopi di e hende nan rond di mi incluyendo mas di mi mes. Mi ta den e crisis momentario na unda mi no ta sigur si mi kier sigui mi pasion cual ta arte den varios forma of bay pa e opcion cu tambe ta atrae mi cu ta economia. Desde 2014 mi a haya mi mes den e circulo nan adecua pa haci trabounan boluntario pa evento. Mi a yega asina leu di freelance manera assistent di relacionnan publico cu e mesun personanan di Fundacion MiPor, Vanderbiest&Co y Connect Aruba. Actualmente riba un stand-by mode na cualkier evento cu ta presenta. Mi a haya mi mes tambe sumamente entreteni creando contenido na mi instagram cual mi ta considera manera un hobby.”

Futuro y sociedad

Bon Dia Aruba a puntra e hoben kico e ta pensa di e opcionnan cu e isla ta ofrece hobennan, Tambe e ta papia un tiki di su futuro ambicionnan y con e lo kier duna bek na e isla.

Ultimamente, mi ta pensa cu e isla ta ofreciendo hoben mas opcion cu anteriormente disponibel. Mi ta sigur tin persona nan cu ta responsabel pa e upgrade aki na cual ta desconoci pa mi pero mi lo kier duna nan danki. Si tin cosnan cu mi ta desea di ta miho, y mi sa wak persona nan cu kier sigui pa dilanti limita na un of otro manera pa e mesun sistema cu nos ta sigui. Mi ta kere cu ainda tin espacio pa cambio y si no tin mi ta sigur cu tin cosnan cu por wordo drecha asina tur hende cu kier tin un opcion por tin un opcion.

Mi a mira hopi cambio den e ultimo decada aki cual ta bon, e ta un señal cu nos ta riba nos pia y nos ta moviendo pa un miho mañan. No solamente pa e embeyecemento di e isla pero tambe e mehoracion di e personanan riba dje, mi ta mira un sociedad cu tin un mente hopi mas habri pa tur cos cu ta nobo, innovativo y diferente”

Pa finalisa e hoben ta comenta cu e ta spera di por bay studia exterior, haya experiencia y trece esaki bek su isla. E ta pensa cu pa ora e bay y bin bek, e isla ya caba lo ta un luga hopi mas placentero.

You May Also Like

Artista Jess Wolff: ‘Experimentacion ta desaroya identidad’

Durante un entrevista cu artista multidisciplinario Jess Wolff, Bon Dia a combersa cu e ...

Mimo’s Ice Cream Rolls a habri su porta nan na Paseo Herencia

Recien Mimo’s Ice cream rolls a habri su portanan na Paseo Herencia y manera ...

Betico Ride cu un acogida amplio di hende muhe

Ayera mainta riba Dia di Betico un grupo di persona cu ta core motorcycle ...

‘Bo por integra na Aruba hopi lihe si bo pone di bo parti’

Reconociendo nos Arubianonan nobo den cuadro cu celebracion di 18 di maart, nos a ...

Hilton Aruba ta sponsor Aruba Birdlife calender pa 2018

Pa tercer aña consecutivo, Hilton Aruba Caribbean Resort & Casino ta sponsor e kalender ...