E ta un musico Arubiano radica na Hulanda, kende ora ta subi scenario ta demostra e sanger Latino cu e tin den dje, deleitando su publico cu canticanan contagioso di diferente pais como Brazil, Colombia, Venezuela y Caribe.

Den un entrevista cu Bon Dia Aruba, Aymar a conta cu el a scoge e ritmo Latino door cu na Hulanda no tin hopi artista cu ta toca musica bieu di antes, como Bolero of Trio Los Panchos. Pa e motibo ey, el a dicidi di haci esey ya cu e ta canta den diferente idioma como Spaño, Portugues, Frances, Italiano. “E ora ey e hende ta haya mas e feeling cu nan ta den pasado y den nan pais tambe,” el a bisa.

Den un solo palabra e ta defini su mes como un persona “Alegre. Pasobra mi ta haci loke mi ta stima. Mi ta laga hende biba nan bida y mi no ta biba cu envidia.”

E ta biba na Hulanda for di 16 aña caba, unda e ta dedica su tempo na su baby chikito di seis luna, su pareha cu pronto ta bay bira su casa, su lesnan di musica tres biaha pa siman y su shownan.

Manuel ta nan prome yiu. Aymar a sigura cu e hunto cu su pareha ta siñando hopi di dje y e mes ta “bayendo scol di tata”, cu tur dia ta zorg pa dedica hopi tempo na dje y toca musica p’e, vooral den e prome añanan cu ta hopi importante pa un mucha su desaroyo.

Aymar a menciona cu for di tempo e tabata chikito el a dicidi di canta. E, tabata fanatico di Shakira y e tabata gusta wak television na unda tabatin un programa den un canal di television Venezolano yama “Club de los Tigritos” hopi famoso entre e mucha y hobennan den añanan nobenta pa e serienan di Salserin. “Mi a crece cu tur e artistanan ey y mi kier a bira cantante manera nan. Despues ma siña canta ora mi tabatin 16, e ora ey ma tum’e na serio y cada bes mi a keda mehora mi mes.”

Di loke ta trata e diferencia di toca na Hulanda of na Aruba, el a splica cu e no ta haya diferencia pa motibo cu “semper mi ta mi mes como artista. No ta importa cua pais bo ta bay, bo ta keda bo mes y cu e show cu bo a crea, si bo ta cambia algo e ta bay sinti straño. Loke mi ta cambia si ta mi repertorio di un tiki mas akinan pasobra mi sa cu hopi na Aruba a conoce di e canticanan. Manera ora mi ta toca Juan Luis Guerra cu tin otro artistanan tambe cu ta toca Juan Luis Guerra, mi ta purba di toca otro cancion cu ta diferente di loke bo ta scucha na Aruba caba.”

Pero e publico na Aruba si ta diferente. E ta mas dificil compara cu esun di Hulanda, debi cu nan ta conoce e musica caba. “Si mi ta toca otro cosnan cu nan no ta custuma, nan ta gosa, pero na Hulanda mi por toca mas musica cu ta wordo toca akinan,” el a bisa.

Aruba tin hopi talento den industria cultural, creativo y artistico pero tin biaha nan no ta haya suficiente apoyo di e mesun comunidad. Pa cu esaki, Aymar a comenta cu “hende tin cu tuma e musiconan y artistanan den general mas na serio. Algun di nan no ta haci e trabao aki como un hobby sino cu nan ta biba di dje. Y tambe gobierno por yuda wak e musiconan y artistanan mas como echt un trahado, un ambtenaar, pasobra ta importante tambe pa e turismo. Ta bon si nan ta mescla e artistanan cu turismo pa e turistanan por disfruta mas.”

Tambe ta existi hende cu ta cuestiona e labor di un musico, manera Aymar a señala: “Ainda tin hende cu tin e creencia cu musica ta un hobby, pero si bo duna chens na hendenan pa wake mas manera un trabao, mas hende na Aruba ta bay bira miho den musica, ta bay tin miho musiconan cu por toca afo despues y bibando na Aruba. Esaki ta conta pa tur artista como pintor, artesano, diseñadornan di paña, entre otro.”

Aymar tambe a informa cu e ta fanatico di hopi artista, tanto local como internacional y den esaki el a anuncia cu e kier haci un colaboracion cu Edjean Semeleer, unda e tin planea y ta bezig cu un cos pa canta algo cune. “Pero desde dia cu mi a haya mi yiu mi a tuma un pausa di skirbi cantica y composita, e aña aki mi ta bay cuminsa back atrobe cu mi mesun canticanan.”

Pa finalisa, el laga como mensahe pa hendenan apoya hubentud musical, artistanan di cualkier categoria, “pusha esnan cu si kier bay den musica, yuda nan y stop di wak musica como hobby,” el a declara.

Pa mas informacion di dje, por busca riba su rednan social como “Aymar Music”. Potretnan ta cortesia di Aymar mes y di Bon Dia Aruba.

LEAVE A REPLY

Please enter your comment!
Please enter your name here