“Mi tata tabata encurasha mi y mi tabata haya e sport fun” ta e prome palabranan cu Ayrton Schenker a bisa den un entrevista special cu redactor di Bon Dia Aruba a haci cune pa trece dilanti loke e mas ta gusta, cu ta golf y futbol.

Ayrton den su prome entrevista cu prensa a mustra di ta un mucha lief cu ta na derde klas di Mon Plaisir School e cual a cuminsa haya pasion pa deporte ora e tabata mas chikito.

Su tata Neomar, a conta cu entre cuater pa cinco aña pasa su persona tabata biba na un hotel na Corsou door cu el a bay pa un special assignment, eynan e tabata tuma cursonan di golf di manera recreacional y ora Ayrton tabata bay cerca dje nan tabata bay hunto pa hunga golf y asina ey e parti fun a bira un di e deporte mas gusta di Ayrton.

“Eynan nos a cuminsa wak cu e tin e amor pa sport y el a sigui mustra interes ora e tabatin 3 aña”, su tata a menciona.

Tambe el a relata cu el a yega di inscribi Ayrton den baseball pero eynan el a cuminsa ripara cu su yiu no tabatin conexion cu esey y el a dicidi di bay hunga golf back, su tata a sigura cu e tabata sinti contento “eigenlijk ora mi tabata na Corsou mi tabata biba mi so, y pa distraccion mi a cuminsa cu golf, ora Ayrton tabata bin cerca mi nos tabata bay den naturalesa y asina ey e conexion a bin y el a pik esey up, awor mi ta durf di bisa cu e ta hungando golf mas miho cu mi” el a expresa.

Ayrton su tata ta señala cu golf tin un importancia pa henter e bida di un persona “unda bo ta reta bo mes y bo tin disciplina.” P’esey ora Ayrton a mustra interes pa hunga golf su tata a cuminsa dedica tur su tempo na dje, pa su yiu sigui crece den e deporte aki.

Aworaki, Ayrton ta training na Tierra del Sol door di e coach James Kiley (golf professional instructor di Tierra Del Sol) pa asina ey e por logra di bay Merca cu US Kids Golf Foundation, manera e mes a sigura y tambe a conta cu Tiger Woods ta un idolo p’e.

US Kids Golf ta un organisacion crea na aña 2000 y ta dedica pa haci di e deporte di golf algo mas facil di siña pa e muchanan por disfruta di dje, nan ta reconoce e necesidad di implementa programanan di training pa competencianan hubenil. Ademas, nan ta organisa mas di 1.600 evento den henter aña, pa loke nan a bira e organisacion di torneo di golf mas grandi na mundo.

E organisacion aki ta zorg pa muchanan entre 4 te cu 12 aña haya oportunidad den diferente estadonan cu ta haci competencia, “pero prome cu bo yega na US Kids Golf bo mester pasa door di cierto cualificacion prome cu bo yega eynan”, Ayrton su tata a declara.

Nan a cuminsa caba tuma contacto pa Ayrton por logra esaki, su tata a bisa cu nan kier bay na Medellin, Colombia pa Ayrton por hunga y cualifica den seis rond, ora ey e lo subi su score pa Ayrton por bay Merca, “pa nan wak con Ayrton ta y e por haya su oficial handicap”.

Den terminonan di golf, Handicap ta un promedio di golpinan pa torneo cu cada hungado tin, esaki tambe ta depende di e tereno cu ta wordo usa pa hunga.

Aruba mes no tin un organisacion of federacion aproba manera US Kids di Merca, segun el a sigura, “bo no por haci cualificacion na Aruba pa wak con bo score ta pa bo bay, golf ta un wega hopi basa riba gentleman y bo mester tin hende cu ta testigo cu di berdad e mucha ta asina bon, p’esey bo mester tin e cualificacion pa wak realmente con e mucha su nivel ta”, el a sigura.

Pero Ayrton su soño ta comparti, pa motibo cu tambe e ta gusta hunga futbol y e kier bira un hungado profesional den e deporte aki ademas di yega asina leu manera su idolo Tiger Woods ta of mesun profesional cu e hungado local Dylan Ross, pa asina ey biaha rond di mundo haciendo loke e mas ta gusta, hunga golf of futbol acompaña di su tata cu ta su fan number uno cu semper ta para su tras.

Sin laga scol atras, Ayrton su vak faborito ta rekenen algo cu e ta usa y aplica hopi ora e ta hunga golf, e palo tambe yama “driver, hero of iron” tin un cierto grado of angulo cu ora e ta dal e bala e por bay ariba of straight unda nan tambe tin cu wak con e biento su direccion ta.

Pa finalisa, e mensahe di Ayrton su tata na otro mayornan ta “laga muchanan bay den lo cual nan ta gusta” y Ayrton a culmina su entrevista bisando “never give up and always go after your dreams”.