AZV: ‘No tin base legal pa cubri intake pa persona cu lo mester un psicologo’

Den cuadro cu e tema di ayudo social y psicologia, nos a sigui e discusion cu AZV riba e parti di cubrimento di psicologia pa un pashent. Nan ta splica cu nan no lo por cubri un intake pa un persona cu kisas lo mester un psicologo pasobra actualmente no tin base legal pa esey.

Actualmente pa loke ta trata e parti di psicologia, segun vocero di AZV Solange Tchong ta splica Bon Dia, ta asina cu nan no tin psicologia incorpora den nan pakete. Esaki tabata un decision cu a wordo haci ya caba for di 2001 ora cu e introduccion di AZV a tuma luga, segun e ta informa nos. “E no ta algo cu AZV por tin influencia riba dje. Pasobra AZV como organisacion ta ehecuta e ley”, sra. Tchong ta bisa. Pues den otro palabra, loke den tempo aya a keda dicidi por medio di parlamento y tur hurista envolvi cu e skirbimento di e ley aki y tambe di e escogencia di e pakete, ta locual AZV ta bay over na ehecuta.

Cubri intake
Nos a puntra pa kico AZV e ora no por sikiera cubri un tipo di intake pa wak si un persona tin necesidad di un psicologo y despues e por sigui cana su caminda debidamente. “AZV no por cubri esaki pasobra no tin un base legal actualmente pa haci esey. Atrobe, e no ta den e pakete.” Fuera di esey tambe, AZV ta recorda cu nan a wordo introduci pa cuido curativo. Kiermen unabes un persona tin un malesa, e ora ey lo bo cuminsa haya e cuido.

Desaroyonan nobo
Locual si AZV ta wak segun sra. Tchong ta e desaroyonan nobo. “Pasobra AZV no ta bisa cu un terapia of guia via un psicologo no ta algo bon. Nos no ta distingi entre bon y malo. Todo lo contrario, si bo wak desaroyo awendia bo ta bay wak cu hopi biaha e terapianan ta multi disciplinario,” e ta splica. Es decir un psikiatria cu ta un persona cu por prescribi remedi pero no tur ora tin e tempo pa haci e guia psikiatrico of psicologico. Bo ta bay haya cu awendia hopi biaha door cu e terapia mester ta multi disciplinario, bo ta haya un combinacion di e psikiatra cu e psicologo trahando hunto. Esaki ta un desaroyo cu AZV si kier en todo caso duna su aporte segun e vocero. Anto un forma cu nan a haci esaki ta door di bisa pa organisa cierto departamentonan hunto, manera nos a yega di publica caba over di dje.

Fundacion Respaldo/Salud Mental Aruba
A cuminsa cu e trabaonan aki di unifica e departamentonan por medio di Fundacion Salud Mental Aruba – un fundacion relativamente nobo cu a haya e nomber di Respaldo entre tanto – pa yuda e hendenan cu malesanan mental.

Esaki ta haci cu loke AZV si ta bay percura pe awo, ta cu en todo caso e parti di sessionnan psicologico wordo incorpora bao di fundacion Respaldo.
“Es decir cu e psikiatranan lo bay traha conhuntamente cu psicologonan. Y psicologonan cu ta esunnan cu lo por duna terapia y guia pa e pashentnan cu malesanan mental.” “Mas cu claro kisas esaki no ta cubri tur cos segun AZV. Pasobra hopi biaha ta papiando eynan caba di casonan di malesa mental un poco mas grave of casonan hopi dificil. Tchong: “Pero sigur cu si na banda di AZV e ta un forma pa bisa ban cuminsa habri porta y wak tur unda por mehora.”

Introduccion di mas cuido
Den transcurso di añanan desde cu AZV a start, nan a percura pa bin cu introduccion di diferente cuido cu no tabata tin antes. Por ehempel segun sra. Tchong, antes ora cu bo tabata tin problema di stoma of tripa, mayoria di biaha bo tabata wordo referi pa un internista. Aworaki tin specialistanan specificamente pa esaki. Un otro area cu a mehora tabata e area di oncologia pa tin hopi mas terapia y opcionnan.

“Kiermen poco poco AZV tambe di su banda ta sigui desaroyonan pa toch semper wak unda por mehora. Un di nan cu nos ta bay haci ta manera menciona caba, cumpra e cuido medico pa malesanan mental cerca fundacion Respaldo. Y purba incorpora tambe cu via esaki hendenan por haya e cuido tanto via un psikiatra como di un psicologo.”

You May Also Like

ilegal boto.JPG

Tin hopi boto chikito y yate cu ta transporta pasahero cu ta keda ilegal na Aruba

Den un encuentro cu SPA, SADA y FTA minister di Husticia Arthur Dowers ta ...

‘Instancia no por haci mucho si no tin cambio den ley’

Recientemente a surgi un discusion riba e topico di abuso di mucha relaciona cu ...

child_abuse_0.jpg

Ki dia lo bin cu castigo pisa pa violacion di mucha?

Awendia violacion di mucha ta birando un trend na Aruba, pa motibo cu no ...

Fundacion Rancho a duna contenido y balor na Dia Internacional di Migrante

Diamars ultimo a wordo conmemora Dia Internacional di Migrante. Un fecha cu Asamblea General ...

inmigrante venezolano y dellincuencia.jpg

Aruba no mester tin un impresion negativo di e Venezolanonan

Sra. Laura Luces kende tabata un di e voceronan di e accion cu a ...

PAR a gana eleccion Corsou

Cu 6 asiento (4 +2 restzetel) PAR a sali ganado di e eleccion na ...