AZV: Nos a aproba peticion di mucha Sheyden mesora

Den cuadro cu storia recien di e mucha di dos aña diagnostica cu cancer, AZV ta laga sa cu nan a aproba e peticion mesora pa e mucha bay Hulanda y tabata tin avion cla p’e diasabra mes.

“A drenta un peticion diasabra cerca AZV pa e yiu di Edmar Winterdaal (Sheyden Hose) y mesun dia nos tabata tin un avion cla pa mand’e afo. Pero riba peticion di e mama pa regla toch algun cosnan cu tabata tin pendiente, e ora a opta pa ayera tardi nan sali pa Hulanda,” vocero Solange Tchong ta bisa Bon Dia Aruba.
Nos a puntra su reaccion despues di publica e storia di e tata di e yiu di 2 aña cu pa basta tempo nan ta luchando cu dokternan pa haya sa kico ta causando e mal salud di su yiu. Cada bes cu nan a hiba e mucha dokter, segun e tata Winterdaal, nan lo mand’e cas cu un ‘Paracetamol’. Finalmente a logra un bishita cu e specialista y a resulta cu e mucha tin un tumor den su riñon.

Comision medico
AZV tin un comision medico cu ta atende cu e peticionnan aki kende ta traha 24/7, constantemente ‘on call’ pa casonan di calamidad. Segun procedura y maneho di AZV, semper ora ta rekeri un menor di edad, e ora ey un mayor so por bay riba gastonan di e seguro. E tata a pidi ayudo di comunidad pa cu su gastonan pa e bay acompaña su yiu. Con largo e trayectorio aki lo dura AZV no sa ainda pero generalmente segun sra. Tchong casonan asina ta tuma transcurso di par di siman.
“Mester pensa den direccion di por ta tres te cu seis of ocho siman. Depende na kico nan haya sa. E caso aki ta un poco particular pasobra mi por a compronde for mi coleganan medico cu e no ta un tipo di enfermedad comun loke e mucha tin.” Pues den sentido cu no ta pensa di biaha den direccion di cancer ora ta papia di mucha segun sra. Tchong.

Caso excepcional
Generalmente den mucha, segun AZV ta keda enfatisa, nunca ta bay mesora den cosnan grave manera esaki pues ta papia di un caso excepcional. “Pasobra na momento cu bo ta consulta e mucha cerca e dokter di cas, sigur e dokter su prome meta ta e bienestar di e mucha. Pero probablemente lo no a pensa nunca den direccion di algo asina grave.” Riba e parti di evaluacion medico, Bon Dia Aruba lo acerca Asociacion di Dokternan di Cas pa mira con e procedura aki ta hinca den otro ora cu ta haci peticion pa un specialista.