Prins Harry y su casa Meghan, e dukesa di Sussex, ta contento di anuncia cu nan ta mayor di un baby mucha homber, cu ainda no a dicidi nomber, kende ta bira e di shete den liña pa e trono Britanico, y ta reina Elizabeth su di 8 bisnieto.
E baby ta e prome yiu di e prins cu su casa, kende a casa aña pasa. E dukesa ta un actriz retira di 37 aña conoci como Meghan Markle. E prins, di 34 aña, ta e yiu di prins Charles, kende ta e siguiente den linea pa e trono y yiu di prinses Diana, kende a fayece na Paris na 1997.
Dialuna mainta, Meghan a drenta den proceso pa haya e baby. Oficialnan di e palacio no a duna informacion di e parto unda e dukesa lo ricibi e mucha, pero a bisa si cu e prins tabata na su banda. Ningun otro informacion.
E mucha lo por tin dobel nacionalidad Britanico y Mericano si Meghan y Harry dicidi di bay pa e proceso di aplicacion. Periodista, hunto cu otro hende, a campa pafo di Windsor pa warda e baby yega. E mayornan no tin planea di sali afo pa saca potret of sali den publico cu nan baby pa algun dia, asina nan por disfruta di e baby den privacidad.
Meghan, kende ta di California y tabata actua den serie Mericano, tambe tin un divorcio, y ta un feminista fuerte. Tambe yiu di un mama di color y un tata blanco, e ta identifica su mes ‘biracial’. Harry a bisa cu e kier proteha su casa di media, y Meghan a bisa cu lo tene mayoria di detaye di nan parto den priva.
