Bacteria di gonorrea ta birando mas resistente contra tratamento

Malesanan transmiti sexualmente (ETS) ta infeccionnan cu ta wordo transmiti di un persona pa otro via contacto sexual. E causanan di e malesanan aki tin di haber cu bacteria, parasito, schimmel y virus. Ta existi mas cu 20 sorto di ETS, y esunnan mas conoci ta: Chlamydia, herpes genital, gonorrea, HIV/AIDS, VPH, syfilis y trichomoniasis.

Recientemente autoridad di salud publico di Corsou a alerta su poblacion riba e aumento di malesanan contagioso sexualmente debi na e aumento di e fenomeno di prostitucion ilegal. Nan a hacie pa nan poblacion bira mas consciente y preveni cu mas hende ta resulta contagia. Di nos banda, Bon Dia Aruba a tuma contacto cu e seccion di Health Promotion di departamento di Salubridad Publico pa busca mas informacion tocante e situacion di malesa contagioso sexualmente riba nos isla, pero te ainda nos wardando un contesta.

E preocupacion den nos comunidad ta grandi ya cu lamentablemente e problema di prostitucion ilegal ta uno bisto y evidente. Un par di dianan pasa autoridad policial a realisa un razzia pisa unda a keda deteni cantidad di hende muhe cu a bin fo’i e pais bisiña di Venezuela pa eherce prostitucion den bisindario di Playa, cerca di centro di ciudad.

Malesanan transmiti sexualmente
Mayoria di ETS ta afecta tanto hende homber como hende muhe. Pero e casonan di salud di mas gravedad ta wordo presenta cerca e ser femenino, ya cu si un hende muhe na estado ta padece di ETS, esaki no solamente ta afecta e persona sino e baby tambe. E cifra di casonan relaciona cu e malesanan aki ta halto, producto di e relacion sexual sin proteccion. Esaki segun informacion cu e matutino aki a yega di publica den cuadro di Dia Internacional contra HIV/AIDS.

Pa berguensa tin hendenan cu no ta bishita un dokter specialista of venerologo, sino cu nan ta purba di auto receta nan mes. Mester tene cuenta cu e antibiotica ta wordo uza pa trata malesanan transmiti sexualmente causa pa bacteria, schimmel of parasito, pero no semper e tipo di remedi aki ta reacciona efectivamente pa combati e malesa. P’esey ta necesario pa consulta un venerologo cu na Aruba tin pa haya e tratamento mas indica pa combati e malesa.

Mester tene cuenta cu no tin cura pa e malesanan transmiti sexualmente pa causa di un virus, pero tin remedinan cu lo por yuda pa combati e sintomanan y mantene e malesa bou control. Pa evita cualkier acto sexual insigur ta importante pa haci uzo di preservativo of condom cu ta reduci e riesgo di resulta contagia cu malesanan transmiti sexualmente. Sinembargo si e cliente ta bou influencia di alcohol of droga, facilmente e lo por cay y tene relacion sin proteccion.

Gonorrea
E ta un di e malesa transmiti sexualmente mas comun, specialmente cerca e poblacion jong. E bacteria cu ta causa gonorrea por afecta e organo sexual, boca y anus via un persona infecta. Un punto cu mester tene cuenta cu ne ta si un hende muhe na estado ta resulta infecta cu e bacteria aki, e lo por transmiti e malesa na e baby durante e embaraso. Tin biaha cu e gonorrea no ta provoca sintomanan. P’esey ta importante pa diagnostica e bacteria via un test di laboratorio.

Cerca e hende homber e gonorrea por causa dolor ora cu e ta bay pishi y tambe pus cu ta sali via di su organo sexual. Si e persona no ta haya tratamento, e bacteria aki lo por ocasiona problema den su prostaat y testiculonan. Cerca e hende muhe e prome sintomanan di gonorrea generalmente ta leve. Pero na medida cu e tempo ta bay, e ta produci hopi bashamento di sanger durante su menstruacion. Tambe hopi dolor ora cu e ta pishi y pus den su area vaginal. Si e no ta wordo trata na tempo y debidamente, e por causa inflamacion pelvico y problema durante embaraso y te hasta infertilidad.

Vacuna
Ta existi un posibilidad nobo di bin cu un vacuna contra gonorrea. Un estudio a mustra cu e vacuna contra meningitis lo por ofrece a lo menos cierto proteccion. Segun un informacion divulga dia 10 di juli ultimo door di HealthDay News, e posibilidad di un vacuna contra gonorrea cada biaha ta mas cerca di bira realidad. E ta wordo considera un bon noticia, ya cu e bacteria di gonorrea ta birando mas resistente contra e tratamento pa combati e malesa.

E antibioticonan ta e unico tratamento disponibel. Pero lamentablemente a wordo desaroya stammen nan di gonorrea cu a bira resistente contra e antibiotica, segun autoridadnan di salud di Merca. E mundo cientifico ta bin trahado durante mas cu 100 aña pa produci un vacuna contra gonorrea. Actualmente nan a haya un vacuna cu a yuda preveni un tercera parti di e casonan di gonorrea fei di e pashentnan cu nan ta ricibi. Nan ta reconoce cu e vacuna ta leu ainda di ta perfecto; pero e ta un paso den e direccion corecto .

E vacuna ta yama MeNZB y ta un vacuna cu a wordo produci pa controla un epidemia di meningitis na New Zealand entre 2004 pa 2006. E vacuna aki no ta disponibel mas. Pero loke ta ser yama “antigeen” di e vacuna cu e cientificonan a haya cu nan por ofrece un reaccion immuun contra gonorrea a wordo inclui den e vacuna 4CMenB. E vacuna aki a wordo desaroya recientemente.

E investigadonan a haya cu e personanan cu a haya e vacuna di MeNZB tabatin menos riesgo pa resulta infecta cu gonorrea cu esun cu no a haya e vacuna. E proporcion ta un 41% contra un 51%. Na Merca ta wordo conseha pa e poblacion jong y pre teenager. Ademas di muchanan y persona adulto, lo haya dos vacuna contra meningococo, pa protege nan mes contra meningitis. Pero ainda nan tin cu evalua si e vacuna aki ta brinda proteccion contra gonorrea. Cada aña ta existi alrededor di 78 miyon di casonan nobo di gonorrea den henter mundo.

You May Also Like

Polis ta tira lot cua partido ta haya ultimo parada eleccion

Diahuebs pasa lider- y representantenan di partidonan politico a reuni cu polis riba entre ...

Pa cumpli cu ley di enseñansa obligatorio: Mas mucha lo drenta scol na augustus

ORANJESTAD – Minister Rudy Lampe a laga sa cu for di Hulanda a yega ...

ATIA ta lamenta accion di Duana

Ayera mainta duana a tene nan reunion a consecuencia cu e trabou di saca ...

Otmar Oduber

Premier Eman y minister Oduber y no a papia ainda

No tin un desaroyo nobo despues cu minister Otmar Oduber a reuni cu Gobernador ...

universidad (2).jpg

68 studiante pa Academic Foundation Year

Universidad di Aruba ta brinda un caluroso bonbini na 68 cursista pa su programa ...