Segun e Ministro di Salubridad di Bahamas, Duane Sands, tin e probabilidad cu e total di victima mortal di horcan Dorian por ta hopi mas halto cu e 30 victimanan conta te awor na Abaco y Grand Bahama, mientras cu e catastrofe ta sigui bira mas visible. El a bisa hende cu mester ta prepara pa un conteo final abrumador, papiando na un radio local diahuebs den oranan laat.

“Publico mester ta prepara pa informacion inimaginabel tocante e total di morto y di sufrimento humano,” el a bisa. Cruz Cora Internacional ta calcula cu casi mita di tur vivienda na Grand Bahama a keda destrui, mientras hopi area a keda inunda. Ta bisa cu Grand Abaco ta virtualmente inhabitabel. E cifra oficial ta ainda na 30, pero e servicionan di rescate no a yega ainda na e areanan mas aleha cu a ser golpia mas fuerte.

Tin miedo di sakeo dor di sobrevivientenan, awor cu e bientonan di 200 miya pa ora a bay y e awasero intenso a mengua.

Diesocho miembro di e delegacion di Congreso Mericano a haci un yamada riba Presidente Trump pa elimina exigencia di visa temporalmente pa ciudadano di Bahamas cu ta busca refugio cerca famia na Merca despues di e horcan.

E delegacion ta uni nan mes na e dos Senadornan republicano Marco Rubio y Rick Scott, cu diaranson a skirbi un carta similar pa Trump indicando e necesidad di “refugio y reunificacion cu famia na Merca.” Aproximadamente 20.000 ciudadano di Bahamas ta biba na sur di Florida. Hunto cu gobernador Ron DeSantis, e dos senadornan a bay Bahamas pa pone nan mes na altura di e situacion aya, pa mira con por yuda.

 

LEAVE A REPLY

Please enter your comment!
Please enter your name here