TripAdvisor a anuncia cu nan lo marca advertencia di acoso sexual riba ‘reviews’ pa biahantenan por sa cual acomodacion, restaurant y tour tabatin reporte di atake sexual, violacion o acoso sexual.

TripAdvisor a haya presion pa controla su ‘reviews’ despues cu a publica un informe di un investigacion di Free Press, cu a revela cu victimanan di violencia sexual den resort y hotelnan na Jamaica a duna detaye di nan caso riba TripAdvisor pero cu e resortnan a traha duro pa kita e reviewnan aki, haciendo imposibel pa biahantenan keda notifica di e riesgonan di tal acomodacionnan.

Ademas, Sandals Resorts International ta urgi un hues na New York pa rechasa tratamento di un demanda di US$ 30 miyon pasobra e sucedido a tuma luga na su resort na Bahamas y lo mester trata e caso aya anto.

Abogadonan di Sandals a argumenta cu John Pascarella y Ashley Reid Pascarella, cu a haya amplio cobertura di e caso di intento di violacion na ambos banda di Atlantico, a firma un documento cu Sandals cu tur disputa legal cu e resort mester resolve na Bahamas.

Sandals su abogadonan a añadi cu e pareha, cu ta alega cu e butler asigna na nan, Moral Adderley, lo a ataca e señora sexualmente durante nan estadia na Sandals Royal Bahamian, a ser mustra e clausula riba tanto nan factura di registracion como riba nan carchi di registracion di huesped.