Bala atrobe den… E cancha corecto…

E veredicto di huez den e caso entama pa e parlamentario, alavez candidato pa ministro, a pone e asunto back unda e tabata pertenece desde inicio caba, cerca Formador. Tabata en berdad necesario un caso unda huez por a scucha detayadamente henter e proceso, pa despues declara su mes no faculta pa mete den un asunto cu ta regarda nombramento di ministro, loke ta prerogativo real, a traves di e reemplazante na Aruba? Di e manera aki en todo caso, tanto tempo despues, ainda e Formador, mientras tanto Promer Ministro, mester tuma e decision di propone e candidato si of no. Y cu esey e pleito politico interno ta tuma tarima atrobe, sin e luho di inventa cualkier pretexto pa posterga e decision mas ainda.

Un di varios pregunta cu a keda ta, sin embargo, si e asunto mester a bay asina. For di e caso por comprende por ehemplo cu a pidi Servicio di Impuesto un declaracion di buena conducta fiscal. Ta parce masha logico cu a cumpli cu e peticion aki, segun legislacion fiscal. Pero den e veredicto huez ta comproba cu e declaracion duna no ta cay den e categorianan cu ley fiscal ta prescribi. For di declaracion di director di e departamento ta resulta tambe cu e ta un peticion special cu, manera huez a formula esaki: “Een dergelijke verklaring is een vorm van service van de Belastingdienst”. Pero, si esey ta asina, lo no tabata mas logico pa pensa cu loke ta primordial ta e conseho confidencial na Formador, cu no ta confidencial mas, a menos cu tin mas asunto eyden cu no ta den e declaracion cu e candidato pa ministro a haya di Servicio di Impuesto. En todo caso lo tabata prudente pa duna prioridad na e rapport obligatorio, segun ley di Integridad di Ministro, na e Formador y comunica na e candidato cu e por tuma contacto cu Formador pa atende continuacion di e proceso. Tambe por a considera entrega e declaracion despues cu e conseho di e departamento a bay pa Formador pa e termina e proceso, dunando prioridad na e proceso di nombramento y no na e peticion di e ciudadano candidato, cu ta reclama esaki como un derecho manera cualkier ciudadano, pero cu na e momento ey tabata stroba un proceso confidencial di e Formador. Si a actua asina, anto basta tempo pasa por a cay e decision si ta propone e candidato y lo a splica su persona, manera e ley menciona di integridad ministerial ta bisa cu, sea ta propone su persona como ministro y no tin nada di discuti tocante contenido di e rapport, o Formador ta splica cu no por a propone e persona, splicando pakico no, manera ley ta bisa.

Y aki nos ta yega tambe na un punto clave den henter e asunto: e motibo pa eventualmente no propone un candidato no necesariamente ta depende di haya un ‘visto bueno’ den tur declaracion cu e ley ta menciona como obligatorio y manera e candidato ta presenta e caso, y pakico no? Pasobra, manera nos a comenta den un anterior Editorial, e decision di nombra no ta di e Formador. Ta necesario convence esnan cu ta responsable pa nombramento di ministro, cu no ta residencia na Aruba. Atrobe nos ta referi, como ehemplo, na un caso den pasado unda nombramento no a tuma lugar, no pasobra na Aruba den e coalicion di e tempo ey tabatin discordia, sino cu na Den Haag tabata existi obhecion contra e persona. Como cu tabata trata, mescos awe, di procesonan confidencial, no ta bisa publicamente kico tabata e motibonan, simplemente e candidato no ta bira ministro. Y den e proceso actual sigur no tin baymento cerca ningun huez, e lo bisa di antemano cu e no ta faculta pa tuma e caso.

Pero awor e pregunta mas importante: kico ta bay pasa na e frente politico? Nos por a tuma nota di e comentarionan cu, si no tin nombramento no lo tin mayoria mas tampoco pa sostene e gabinete di coalicion actual. Tocante esey nos lo bisa awor, cu nos lo mira ora nos yega na e punto ey. Motibo pa pensa asina ta cu practica politico na Aruba ta mustra cu bandona un partido y bay sinta como independiente di ningun manera ta garantia pa un continuacion di carera politico. E problema no ta con pa sinta resto di e periodo den Staten, e problema grandi ta: con pa continua despues? Aki ta topa cu e decision dificil pa, sea join otro partido si ta posible y deseable, o lanta un partido nobo. Ningun di e dos opcionnan aki ta resulta facil ni exitoso sin mas.

Di otro banda, no ta descarta e posibilidad cu Formador ta propone e candidato, si e ta haya cu tin un base pa esey. Aki nos ta bolbe adverti cu e asunto di e rapport di DIMP no ta bisa tur cos; e proposicion mester keda acepta tambe. Di otro banda, tin interes grandi, y no di e politiconan ni e partido envolvi. Manera gran parti di mundo nos ta para dilanti tempo cu por resulta hopi mas dificil cu loke nos por a pensa ora aña a habri. Un caida di gobierno awor ta un responsabilidad hopi grandi pa acepta y cu no necesariamente lo duna exito electoral, si eleccion lo ta e resultado di e conflicto aki. Lo ta bon pa e actornan den e caso, sigur e candidato, reflexiona riba e intervencion den un proceso unda confidencialidad ta tur cos. Respet pa esey por ta un factor determinante.